Home » Sint Maarten, Corsow y Aruba ta firma acuerdo pa fiansanan di Covid

Sint Maarten, Corsow y Aruba ta firma acuerdo pa fiansanan di Covid

by Admin
0 comment 236 views

 

Sint Maarten, Corsow y Aruba a firma e acuerdo di fiansa pa refinanciamento di e fiansanan di Covid. Hulanda a mustra boluntad pa refinancia e fiansanan na un balor di 1,17 biyon euro, paso ya tabata conoci cu e Paisnan no ta capas pa paga esaki den un solo biaha. Durante pandemia di Covid e fiansanan tabata necesario, paso e Paisnan mes no tabata dispone di suficiente medionan financiero pa frena e consequencianan negativo di Covid, y pues tabatin mester di sosten den esaki.  

 

Banda di e fiansanan Hulanda a duna e Paisnan den e temporada ey yudansa humanitario na balor di mas di 220 miyon euro. 

 

Riesgo pa caha di gobierno

E negociacionnan tocante e condicionnan pa refinanciamento ta canando for di februari di e aña aki. Hulanda tabata dispuesto na refinancia e fiansanan contra un interes abou si e Paisnan lo a cumpli cu algun condicion. Esaki tabata necesario paso Hulanda mes tambe mester fia plaka cu interes di 3,2%, pa haci e refinanciamento posibel. A pidi tur pais pa haci un calculacion independiente di e refinanciamento. Asina por a determina e carga di debe pa cada pais. Na mes momento e Paisnan por a presenta nan plannan pa mehora e economia. Adicionalmente tabatin algun condicion specifico pa Aruba, Sint Maarten y Corsow cu mester yuda e paisnan aki cu ta financieramente vulnerabel evita problemanan financiero den futuro. Hulanda a buta e condicionnan aki paso e riesgo pa e paisnan y Hulanda ta sumamente halto si no cumpli cu pago di e fiansa.

 

Aruba

Despues di consultanan intensivo cu Aruba den e ultimo dianan, a ahusta e acuerdo di fiansa riba algun punto. Hulanda ta ofrece Aruba refinanciamento di mas aña di e debe contra un interes di 6,9%. Esaki ta den liña cu e interes cu Hulanda lo pidi paisnan cu un creditrating abou, igual na esun di Aruba. Si Aruba bay di acuerdo cu e Ley di Reino, e pais ta bin na remarke pa un interes mas abou di alrededor di 3,4%. Un Lei di Reino ta necesario paso e ta contribui na bon maneho financiero. Ta un condicion importante pa finansas publico sano pa tambe den temporada di contratiempo por realisa suficiente inversion pa habitantenan. Hulanda ta dispuesto di papia tocante di adaptacion di e proposicion di ley actual, pero ta considera importante cu no por adapta normanan di presupuesto unilateralmente.  

 

Corsow

Pa tanto Corsow como Sint Maarten tabata necesario di tin un acuerdo administrativo pa un plan di rescate financieramente realistico y solido pa e compania di seguro debilita, ENNIA. Un plan di rescate tabata necesario paso entrante 1 di yanüari 2024 tabatin e peliger di pobresa pa 30.000 asegurado na ambos pais. Tanto e habitantenan como e Paisnan lo haya nan confronta cu consecuencianan personal y social grandi. Apesar cu Corsow a firma e acuerdo di fiansa, e la mara tres condicion na esaki. Hulanda a bay di acuerdo cu dos di e condicionnan aki. Ta trata di un reserva dor di Conseho di Minister di Corsow y – si esaki ta necesario – di parlamento pa aprobacion di e acuerdo di fiansa. Hulanda sinembargo ta considera esaki como condicionnan disolviente pa e acuerdo di fiansa. Esaki ta nifica cu e acuerdo di fiansa ta caduca si no bin aprobacion di e conseho di minister of parlamento di Corsow. Esaki ta buta cu henter e fiansa lo ta reclamabel di forma inmediato. E di tres condicion di Corsow ta toca e contenido di e acuerdo di fiansa. Hulanda a presenta su interpretacion di esaki y a puntra Corsow si esaki ta cuadra. Asina cu Hulanda ricibi e confirmacion aki, lo tin un acuerdo definitivo cu Corsow tambe pa e acuerdo di fiansa. 

 

Sint Maarten

Sint Maarten tabata prome pa firma e acuerdo di fiansa despues cu anteriormente nan a duna di conoce cu nan ta bai di acuerdo cu sea un inicio nobo of liquidacion di ENNIA. Pa e motibo aki Hulanda a ofrece Sint Maarten un refinanciamento a corto plaso contra e interes mas abou (3,4%). Asina yega un solucion solido pa ENNIA cu cua tur Pais ta bay di acuerdo, lo converti esaki den un fiansa di plaso largo caminda mensualmente ta paga interes so (aflossingsvrij), mescos cu a acorda anteriormente.

 

Nota pa redaccion: pa mas informacion, por tuma contacto cu vocero di Relashonnan den Reino, Karín Fraai +31 6 31019870.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio