ORANJESTAD – Awe mainta Hues di Corte di Husticia a bisa cu e ta haya e homber D.Haseth. culpabel di a abusa di e homber hoben (17). Hues a confirma e exigencia di Fiscal.
ARUBA NATIVE por a compronde cu D.H. ta para riba cu e no a haci nada pero tanto Fiscal como Hues ta hay’e culpabel.
ACUSADO TA CULPABEL
Tratamento di e caso a tuma lugar algun siman pasa caminda D.H., kende ta liber, a para riba cu e no a haci nada.
Awe mainta D.H. no a presenta den Corte pa scucha su sentencia. Hues a bisa cu D.H. ta wordo acusa di a abusa di un hoben homber (17). Hues a bisa cu Fiscal ta haya D.H. culpabel y a exigi 2 aña di prison.
Hues a mustra cu e victima a duna declaracion extenso con el a wordo abusa y con e cas di D.H. ta paden. Polis durante investigacion na cas di D.H. a haya Rush, cu ta un droga.
Hues a bisa cu D.H. a bay busca e hoben pa traha cun’e. Na dado momento D.H. a ofrece e hoben Rush pa e hole cu supuestamente lo dun’e forza. E hoben a bira tur marea y e momento ey D.H. a bay riba dje y a cuminsa kita su carson. Apesar cu e hoben tabata bis’e pa stop, D.H. a sigui y a chupa e parti intimo di e hoben. Despues di a abusa di e hoben, D.H. a bay dun’e den auto pa haci algun respondi. E hoben na un cierto momento a mira chens pa baha for di e auto y core bay.
Hues a sigui bisa cu den e cellular di D.H. a haya mensahe caminda e ta papia cu un persona di e droga Rush, cual el a usa riba e hoben. Hues ta haya cu D.H. a tacha integridad di e hoben y no a respeta e decision di e hoben kende a bisa pa stop.
CASTIGO
Hues a mustra cu durante tratamento di e caso D.H. a keda desmenti y a purba pinta e hoben scur. Hues ta haya e exigencia di fiscal na su lugar y a condena D.H. na 2 aña di prison. Esey ta nifica cu D.H. mester bay sera.