Den Haag – Na Arubahuis a tuma lugar un recepcion pa despedi di director a.i. di Arubahuis drs. Glenda Hernandez.
Na e ocacion aki Minister Plenipotenciario mr. Ady Thijsen a hiba palabra unda ela menciona cu Glenda a keda apunta como director a.i. pa tres luna. ‘Despues esaki a wordo prolonga. E temporada ey Arubahuis tabata pasando den un periodo dificil. Pesey mi ta contento cu Glenda tabata dispuesto pa ocupa e funcion aki pa un periodo mas largo pa asina atende cu algun asuntonan hopi importante. Un di e asuntonan ta e renobacion di e edificio di Arubahuis. Danki na e determinacion di Glenda, por a atrae personanan profesional pa a guia e proceso aki. E projecto ta canando bon y segun plan,’ asina Minister Thijsen a bisa.
Otro aspecto di Glenda como director a.i. segun sr. Thijsen tabata su compromiso y comprension cu e personal y a traha pa engrandese e sentimiento pa ta un team bou di e personal. Minister Thijsen: ‘Tambe Glenda tin hopi comprension pa e situacion di nos studiantenan y nan problemanan. Maske cu algun biaha e mensahe ta dificil, Glenda den esey semper tabata skerpi y hopi cla. Nos como Arubahuis por haci hopi, pero no tur cos. E situacion cu camber pa studiante ta un problema di henter Hulanda. Nos por bisa e studiantenan pa inscribe na tempo; esaki no ta un garantia cu bo ta haya un camber, pero e ta haci bo chens mas grandi. Tambe mi mester bisa cu Glenda tabata un sosten importante pa e departamento di enseñansa di Arubahuis.’
Por ultimo Minister Thijsen a gradici Glenda pa tur loke ela haci y nifica pa Pais Aruba unda ela pone su experticio y determinacion pa un mihor Aruba, sigur riba e tereno social.
Studiementor Rasnaly Cart a lesa un discurso di ex-studiementor Lourdes Bramble-Tromp den nomber di e mentornan. Den su discurso Lourdes a bisa di ta admira e calidad professional di Glenda pa ta un persona social y dinamico, dispuesto pa scucha y bin cu solucionan pa problemanan; un persona cu hopi experencia riba tereno social y den funcion di maneho y gerente.
E programa a termina unda Glenda mes a dirigi palabra na e invitadonan presente. Ela cuminsa na bisa cu ela stop como director di Departamento pa Asuntonan Social na Aruba y a dicidi pa bin Hulanda y Prome Minister a haci un apelacion na Glenda pa atende cu Arubahuis. ‘Retraso den nombracion di un director pa Arubahuis a haci cu mi a keda pa 16 luna y awor mi mes a tuma e decision – pa motibonan personal – pone un punto final na e trabao di director a.i. di Arubahuis. Mi mester bisa cu mi carera professional pa casi 35 aña tabata den diferente posicion ehecutivo na Hulanda, entre otro 15 añ na Gemeente Utrecht. ‘Pami e trabao mas bunita tabata programa manager pa “Community that care” cu tabata un programa di Nederlands Instituut voor Zorg en Welzijn (NIZW). Na 2016 mi a regresa Aruba y a traha pa seis aña como director di Departamento pa Asuntonan Social y banda di esaki mi tabata tin un bunita funcion como programa manager di e Social Crisis Plan,’ asina Glenda a bisa.
Den su discurso Glenda a repasa riba puntonan cardinal cu ela atende como director a.i. di Arubahuis. ‘Den mi encargo mi a traha na 2022 – conhuntamente cu e Minister Plenipotenciario y e personal – un Plan di Reorganisacion Alternativo, cual plan ta den espera pa aprobacion y ehecucion. Tambe mi a desaroya hunto cu e Minister Plenipotenciario y e personal un plan pa vision y un plan di trabao pa e siguiente cuater aña. E plan aki pa casi un aña ta den ehecucion.’
‘Tur e preparacion nesesario pa renobacion di Arubahuis a start desde juni di e aña aki hunto cu DOW. Ta asina cu a apunta un project manager den persona di Alvin Riley. Den coordinacion cu DOW a cana e trayecto pa yega na un architecto pa haci e trabao y pa despues Aruba aproba esaki, asina Glenda a bisa.
Glenda a bisa cu ela traha duro pa drecha e posicion di studiantenan Arubiano. Riba e tereno aki segun Glenda a bai hopi atencion na reunionnan riba un base regular cu e otro Gabinetenan di Minister Plenipotenciario, e Nationale Ombudsman y cu Ministerionan cu ta regarda e situacion di studiantenan Caribense, cu ta confronta problema ora nan bin studia na Hulanda. Pesey Glenda a gradici hopi instancianan cu a yuda den esaki pa nan cooperacion.
Finalmente Minister Thijsen den nomber di e personal di Arubahuis a duna Glenda un regalo como gratitud y aprecio pa su trabao pa Arubahuis.