L.G.Smith Boulevard/ Adriaan Laclé Boulevard – Diaranson marduga algo prome cu 1’or, polis y ambulnce ta wordo alerta di un accidente pisa ariba e crusada di Adriaan Laclé Boulevard cu L.G.Smith Boulevard.
Brommer cu auto
Tawata trata di un Kia Picanto shinishi y brommer marca BMW S1000R.
Ariba e brommer tawata tin dos persona, un cabayero y un dama.
Ambos a ser haya den situacion serio benta ariba caminda.
Testigonan
Na e sitio nos a papia cu dos testigo. Ambos tawata tin un version. Segun un di e testigonan; e brommer no tawata biniendo cu luz y e segun e otro testigo e brommer tawata tin su luz cendi.
Locual a sosode
Na e sitio nos a compronde cu e Kia Picanto tawata bayendo direccion pariba y e brommer lo tawata biniendo cu velocidad bayendo pabou.
Eynan ta sosode un impacto frontal; unda cu e brommer BMW casi nada a resta di dje, y unda e dama ariba dje ta bay cay como un 30 pa 50 meter mas pabou ariba acera. E cabayero a keda benta mas cerca di e brommer.
Varios partinan di e BMW a spart meternan leu; di unda e impacto a tawata.
Tres ambulance a presenta na e sitio unda cu rapidamente a prepara e dama y sali cu maximo urgencia direccion Hospitaal. Despues un otro ambulance a sali cu e cabayero.
Algun departamento a wordo notifica y por a mira manera BFTO(departamento tecnico) y tambe Specialista di Trafico, Fiscal y Hefe di Trafico.
Pues full un investigacion a cuminsa e ora ey, mirando e magnitud di e accidente.
Chauffeur di e Kia Picanto a wordo deteni na e sitio, y ta wordo hiba den patruya mes pa warda, unda cu lo bay haci otro test mas di alcohol cu ne.
Paramediconan mester a haci un check up cu un di e testigonan, debi cu e la bira malo di locual e la presencia.
E accidente aki ta sosode exactamente unda tin un cruz, di un accidente di brommer cu a sosode un 2 aña y mey pasa cu resultado fatal.
