Minister Rocco Tjon:
ORANJESTAD – Dialuna, Minister di Husticia y Asuntonan Social sr. Rocco Tjon, tawata presenta na Post Oscar pa asina celebra dia di Bombero, hunto cu personal di brandweer. Un momento agradabel caminda hunto, den union, a para keto riba e importancia di e trabou cu nos bomberonan ta eherce.
Minister Tjon a desea tur presente y henter e Cuerpo di Bombero un pabien, y a gradici nan pa nan trabou incansabel. Un di e pilarnan di Aruba su economia ta turismo, y sin Cuerpo di Bombero, Aruba su turismo no por florece.
Durante e mainta aki, a reflexiona riba kico tur a wordo haci pa e cuerpo den e ultimo dos añanan. Caminda banda di e presupuesto a aloca 7 miyon florin adicional pa asina por adkiri truck nobo y tur “persoonlijke uitrusting” pa e personal, manera bluspakken, aparato di oxigeno, uniform, handschoen y boots.
Banda di esaki a splica tambe cu e inversionnan aki lo sigui, caminda otro luna tres truck nobo lo ta yegando Aruba. Den presupuesto 2024 a tene cuenta pa adkiri pa prome bes un “ladderwagen” y tambe lo sigui cu diferente opleidingen.
Otro luna e klas nobo lo inicia pa asina reenforsa e cuerpo y pa hunto nan por sigui brinda siguridad pa Aruba. Gobierno di Aruba ta orguyoso di e trabou cu e cuerpo aki ta eherce.
