Paradera/ Ponton – Diadomingo anochi pasa di 8’or un ciudadano a avisa polis cu e lo ta tras di un Ecosport color shinishi.
E vehiculo aki tawata coriendo hopi malo mes, y na altura di Paradera e tuma direccion Rotonde Paperclip. Cerca di rotonde un poco mas e la dal contra e bushalte. Ariba e caminda di Paradera e la hera dal contra tres auto, na varios ocasion; segun e testigo cu tawata su tras.
Na e sitio di e detencion e ciudadano a conta polis cu e la sigui e auto pa asina polis por stop e; prome cu e causa un desgracia grandi.
Momento cu polisnan a par’e tegenover di un supermercado na Ponton; agentenan ta topa cu dos criatura sinta patras, inocentemente.
Mesora un agente femenino a saca for di e auto y pone nan sinta den e patruya, mientras a bay over mesora na detene e chauffeur cu di baina por a para ariba su pianan.
Polis a bay hiba e muchanan e adres cu nan lo tawata bayendo sano y salvo; mientras cu e homber nos no sa si ta nan tata a wordo hiba warda den transportwagen.
