Dia 28 di september riba Dia Internacional di Acceso Universal na Informacion, Minister Maduro hunto cu Minister President Wever-Croes representando Minister di Enseñansa Endy Croes, a haci e lansamento oficial di e plataforma digital Coleccion Aruba riba www.coleccion.aw. Un innovacion den cultura na Aruba cu ta e resultado di un colaboracion estrecho di 11 instancia cu ta contene informacion di Aruba su historia y cultura. Un colaboracion cu a bira posibel danki na e trabou pionero di sr. Peter Scholing di Biblioteca Nacional di Aruba.
Coleccion Aruba ta nace fo’i e trabou pionero haci na Biblioteca Nacional Aruba (BNA) na unda sr. Peter Scholing a bin ta digitalisa e coleccion di e biblioteca y poco poco a haci e informacion aki accesibel via nan website y tambe via Archive.org, cu ta un archivo digital cu ta brinda acceso universal na informacion. Den un colaboracion estrecho cu e prome partnernan, Archivo Nacional di Aruba, UNOCA, Museo Arqueologico Nacional Aruba, Stichting Monumentenfonds Aruba y Plantage Zorg en Hoop, Coleccion Aruba ta crece y bira e archivo digital mas grandi cu informacion di Aruba na Papiamento.
E trabou pionero aki di instancianan na Aruba a hala atencion tambe riba e tarima internacional. Recientemente e presentacion di Coleccion Aruba a haci un impacto grandi na e conferencia di bibliotecanan, archivonan y museonan ACURIL cu a tuma luga na Jamaica. Paisnan den nos region tin wowo riba Aruba y tambe lo kier traha pa yega na un colaboracion extenso asina cu ta conserva y haci informacion universalmente accesibel. E ultimo aki pa por cumpli tambe cu meta number 16 di e Metanan pa Desaroyo Sostenibel di Nacionnan Uni, SDG’s, pa sigura acceso na informacion. Ta importante tambe pa menciona cu Aruba den representacion di sr. Peter Scholing tin e honor di asumi e Presidencia di Memory of the World for Latin America and the Caribbean, MOWLAC, cu ta e programa di Nacionnan Uni pa asina conserva e historia di Paisnan como memoria di nos mundo.
Como aprecio pa e trabou pionero, e bon colaboracion y e esfuerso grandi pa conserva y haci e herencia cultural di Aruba universalmente accesibel, Minister Maduro den nomber di Gobierno di Aruba a reconoce sr. Peter Scholing pa su trabou pionero pa haci Coleccion Aruba un realidad riba www.coleccion.aw. E mandatario ta gradici sr. Scholing pa e esfuerso grandi y continuo pa Aruba por conoce e innovacion aki riba e tereno di historia y cultura di Aruba. Masha danki pa kere den Aruba!