Home » E droganan tabata den container na Fast Delivery 4 aña di prison exigi pa homber cu a trafica 175,5 kilo di cocaina den saco di hariña pa Hulanda

E droganan tabata den container na Fast Delivery 4 aña di prison exigi pa homber cu a trafica 175,5 kilo di cocaina den saco di hariña pa Hulanda

by Admin
0 comment 337 views

 

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber K.W. (38).

  ARUBA NATIVE por a compronde cu a haya na Fast Delivery, 175,5 kilo di cocaina scondi den 46 saco di hariña cu tabata destina pa Hulanda. E droga aki ta K.W. ta esun cu a trece e saconan di hariña pa Fast Delivery manda Hulanda..

175,5 KILO DI COCAINA DEN SACONAN DI HARINJA

Hues a mustra cu na Fast Delivery a haci control cu cacho anti droga y e cacho a reacciona riba un container cu 46 saco di harinja Caribbean Bakery Supply destina pa Hulanda, Groningen. K.W. tabata esun cu a tuma e pedida pa manda e cargamento di hariña. Segun K.W. el a haci un fabor pa e homber P., na Hulanda, kende e conoce pa hopi aña. El a bisa Hues cu P., a pidi’e pa manda 1000 kilo di harina pasobra e tin un “bakery” cu ta traha bolo. Un tanta di P. a bin cu 3 mil florin pa K.W. pa asina K.W. busca e hariña y mand’e pa P. Segun K.W., P., a bis’e cu e hariña di Aruba ta di Merca y ta di bon calidad. Hues a bisa cu den e saconan di hariña a haya 175,5 kilo di cocaina.

K.W. a bisa cu el a bay cumpra e hariña na Caribbean Bakery Supply. Hues a remarca cu investigacion ta mustra cu e hariña ta procedente di Belgica. Hues a bisa cu e ta haya straño cu for di Hulanda ta manda busca hariña na Aruba cu ta bin for Belgica. Si busk’e for di Belgica direct e ta sali hopi mas barata. Segun K.W. e placa tabata pa 1150 kilo di hariña. Hues a haci K.W. diferente pregunta y el a bisa cu el a djis haci su amigo P. fabor pa cumpra e hariña. El a bisa cu e no sa mes cu den e saconan tabatin cocaina. Hues a bisa cu investigacion a mustra cu K.W. a yega di busca un machine di cose for di exterior. Segun K.W., e no a bestel e machine y nunca a haya esaki.

FISCAL

Fiscal a bisa Hues cu dia 6 Juni 2023, cacho anti droga a reacciona riba 46 saco di hariña cu tabata den un container destina pa Hulanda. A resulta cu tabatin 175,5 kilo di cocaina scondi den e sacaonan aki. K.W. tabata esun cu a cumpra e hariña y a hiba esakinan na Fast Delevery. Fiscal a mustra cu 5 Juni 2023, K.W. a hiba e saconan den un truck na Fast Delivery. Dia 3 Juni 2023, K.W. a cumpra e saconan di hariña. Na opinion di Fiscal, e saconan di hariña a wordo habri y cosi di nobo. Na Mei 2023, K.W. a haya un machine di cosi di exterior. Fiscal ta haya cu K.W. tabata sa di e transporte di droga. Fiscal a bisa cu e no ta kere cu K.W. no tabata sa cu tin droga den e saconan scondi. Fiscal a bisa cu no ta logico cu ta busca hariña for di Aruba cu ta bin for di Belgica y despues mand’e Hulanda. Fiscal a mustra cu traficantenan ta busca tur forma pa e droga yega Europa. El a exigi 4 aña di prison pa K.W.

ABOGADO

Mr. Illes a bisa Hues cu K.W. a haci fabor na un amigo y no tabata sa cu tabatin droga den e saconan di hariña. E abogado ta haya cu no por bisa cu K.W. a exporta droga. A entrega e droga na Fast Delivery pa despues e wordo exporta. E abogado ta haya cu esaki ta un preparacion. Ta keda e acusacion di posecion di droga. K.W. a bisa cu ta pa un amigo P. el a haci un fabor pa manda hariña. P. a bisa cu e tin un “bakery” na Hulanda. Un tanta di P., a trece 3 mil florin pa K.W. Abogado a mustra cu a investiga P. kende tin un lugar di traha bolo y cu e compania di P. a manda mail na Fast Delivery pa haya sa con a para cu su hariña. Esaki, despues cu K.W. ta encarcela. E abogado a bisa Hues cu si K.W. tabata sa cu tin droga den e saconan, e lo no a bay duna su nomber como esun cu ta cumpra. E abogado cu potret den cellular a mustra Hues cu Caribbean Supply ta cambia saconan y no ta manera Fiscal ta pretende cu ta K.W. a cambia saconan. E abogado a bisa cu ta pesey tur e saconan di hariña tin nomber di Caribbean Supply. Esey ta contrario cu loke Caribbean Supply ta bisa cu nan no ta cambia saco y nan ta bin den diferente color.

Mr. Illes a bisa Hues cu e cuestion di machine di cose, ta asina cu a importa e machine di cose, pero esaki a perde na Douane. Nunca K.W. a haya e machine. Mr. Illes ta haya cu no por papia aki cu intencional K.W. a exporta droga.

E abogado a cuestiona cu no tin ningun splicacion den e procesverbaal, con a yega na e 175,5 kilo di cocaina. E abogado ta haya cu ora bay procesa e hariña pa saca e cocaina, e no ta asina hopi. E cantidad di droga aki ta mas cu 1 Miyon florin. K.W. no ta dispone di e placa aki, pues e droga aki lo ta di otro hende. E abogado ta kere cu aki lo mester duna castigo simbolico. E ta haya cu K.W. ta inhusto sera.

Hues a sera tratamento di e caso y a bisa cu e lo bay studia e caso. Dia 27 October 2023 lo tin sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio