Awe, mientras nos ta celebra Dia mundial di Maestro, nos ta para keto pa reflexiona riba e papel vital cu nos maestronan ta hunga den desaroyo di nos alumnonan y nan futuro. E enseñansa ta enfrenta desafionan cu ta rekeri nos atencion y accion inmediato.
Nos maestronan, cu ta yega nan salario maximo na 38 aña, ta merece un posicion huridico cu ta refleha nan dedicacion y esfuerso. Mester reduci e cantidad di alumno pa klas pa garantisa un ambiente di enseñansa optimal y atencion personalisa.
Ta un necesidad pa inverti mas den plataforma digital pa capacitacion di maestronan, unda nan por sigui desaroya nan mes y keda na altura di e ultimo desaroyonan den e mundo di enseñansa. E introduccion di e ‘normjaartaak’ lo ta un stap esencial pa garantisa cu e carga di trabou di nos maestronan ta realistico, eficiente y manehabel.
Siguridad na pia di trabou y un seguro adicional ta na su luga pa proteha nos maestronan.
Nos mester duna esencia na y pone den practica e contenido real di e palabra ‘inclusividad’ den nos enseñansa. E maneho di idioma, of ‘Integraal Taalbeleid Onderwijs 2023′ mester ta conoci pa henter Pueblo. Simultaneamente mester cuminsa traha na e plan di preparacion, capacitacion y inplementacion. E aspecto aki ta crucial pa sigura cu cada alumno por desaroya na su maximo potencial.
Nos ta reconoce e necesidad urgente pa subsidio pa e scolnan cu ta atende cu e alumnonan cu tin necesidadnan special y nos ta pidi pa mas atencion pa e infrastructura di nos institutonan educativo.
Adicionalmente, e procedura di ‘doorstroom’ entre enseñansa basico y enseñansa secundario mester mira cambio. E transicion entre e dos nivelnan di enseñansa ta crucial pa desaroyo di e alumno y, como tal, mester sincronisa e metanan nucleo di enseñansa basico cu esnan di enseñansa secundario mas eficiente posibel, garantisando cu cada alumno por alcansa su maximo potencial sin obstaculonan innecesario.
Nos ta para hunto cu nos maestronan awe y semper, reconociendo nan contribucion y comprometiendo nos mes na mehora nan condicionnan di trabou y e sistema educativo en general.