E siman aki Minister Xiomara Maduro di Finansa ta encabesa e delegacion di Aruba cu ta participa na e ‘Steering Group & Ministerial Meetings’ di ‘Caribbean Financial Action Task Force’ (CFATF), cu ta consisti di sr. Angelo Brete di FIU Aruba, sr. Marcel ‘t Mannetje di Sectetariado di CFATF Aruba, y sr. Nilo Swaen consehero di Gobierno di Aruba. CFATF ta un organo regional di Financial Action Task Force y tin 24 pais Caribense cu ta miembro. E obhetivo principal di CFATF ta pa logra implementacion efectivo y cumplimiento de e recomendacionnan pa preveni y combati labamento di placa y financiamento di terrorismo. Esaki lo ta e prome reunion ministerial den forma fisico despues di e pandemia, den cual diferente Minister y Procurador General di paisnan Caribense ta bini hunto pa representa nan pais y tuma decisionnan strategico pa e organo regional aki por funciona na un forma efectivo. E reunionnan ta tuma luga di dia 3 pa 6 di oktober na Miami, Florida.
Diferente topico ta wordo trata
Durante di e reunionnan diferente topico lo wordo discuti, entre otro; e status di ehecucion di e programa di maneho 2022-2023, retonan di e organo riba tereno di recurso humano y financiero y con por garantisa sostenibidad di e organo aki riba termino largo. Tambe lo tin presentacion di diferente topico cu lo rekeri decision di e ministernan presente pa nan ehecucion, entre otro; e plan strategico di CFATF pa e periodo 2023-2025, aceptacion di e estado financiero di e organisacion pa aña 2020 y 2021, remuneracion di e personal di e secretariado di CFATF cu tin Trinidad & Tobago como base, e plan y presupuesto operacional 2024 y e programa di e presidencia di CFATF pa e aña venidero.
Aruba lo asumi presidencia di CFATF pa aña 2023-2024
CFATF desde su inicio na aña 1990, semper por a conta cu presencia, participacion y apoyo di Aruba. E bon nomber di Aruba riba plano internacional y den region, y e compromiso di Aruba pa salvaguardia integridad di nos sistema financiero demostra den e rapport positivo di e Evaluacion Mutuo di Aruba pa CFATF den luna di september 2021, ta pone cu na Aruba ta toca e honor di asumi e presidencia di CFATF pa aña 2023-2024. Den e reunion Ministerial e siman aki, e desicion aki lo mester wordo ratifica. Den cuadro di e presidencia di CFATF, ta importante pa menciona cu Aruba lo ta anfitrion di e di 57 Reunion Anual di CFATF den luna di november 2023.
FIN