Minister Maduro di Finansa a habri siman den conferencia di prensa ta informa Pueblo riba Articulo 36 di Statuut, cu ta e base pa Aruba fia placa di Hulanda pa surpasa e pandemia di COVID-19. E esencia di articulo 36 di Statuut ta, cu e Paisnan den Reino Hulandes mester yuda otro ‘moreel’ en materieel.’ Aruba a haya fiansa di 916 miyon florin pa surpasa e pandemia di COVID-19 cual ta ‘materieel.’ Sinembargo, e proceso, e condicionnan pa haya e fiansanan y e negosacion pa refinancia e debe di COVID ta pone cu nos mester cuestiona e parti di yudansa moral cu articulo 36 di Statuut ta trece cune.
Hulanda kier su placa bek cu interes
Pa surpasa e pandemia, Hulanda a yuda Aruba door di laga nos fia placa cerca nan. E yudansa aki no ta un regalo, sino un obligacion, ya cu si un Pais den Reino bay malo, esaki ta afecta e Reino Hulandes. Aruba nunca a nenga di paga e placa presta di Hulanda. Locual si ta cuestionabel ta pa Hulanda bay cobra Aruba un interes halto djies pasobra Aruba no kier haci locual Hulanda kier impone.
Interes reduci den Reino Hulandes
Den Reino Hulandes pa e cambionan di 10-10-10 pa Corsou y Sint Maarten por a bira Pais, Hulanda a duna ‘kwijtschelding’ di 70% di nan debe y e resto a bira un debe cu Hulanda na interes reduci cu ta core entre 2.7% y 3.1%. Durante e pandemia tambe Hulanda a yuda Corsou cu Sint Maarten cu fiansa cu 0% di interes. Den e mesun pandemia aki Aruba tambe a haya yudansa di Hulanda cu dos fiansa na 2,64% di interes pa paga dos debe internacional di Aruba cu a madura. Pa e debe mes di 916 miyon florin cu Aruba traha cerca Hulanda pa surpasa e pandemia, Hulanda ta dunando tur indicacion di no bay duna Aruba un interes reduci manera cu sa wordo duna den Reino Hulandes.
Trato diferente pa Aruba den Reino Hulandes ta amoral
Te cu awo Hulanda a menciona interes di 3.1% si Aruba cumpli cu e condicion di cambia e Ley di Aruba pa supervision financiero, e LAFT, pa e ley di supervision financiero di Reino Hulandes, e RAFT. Si Aruba no cumpli cu esaki, e ora Hulanda lo aplica un interes di castigo, un ‘strafrente’, cu lo core entre 6% y 8%. E trato diferente aki pa Aruba den Reino Hulandes no ta hustifica y no ta cumpli cu e esencia di e yudansa cu mester wordo duna denter di Reino Hulandes basa riba articulo 36 di Statuut. Duna Paisnan den Reino Hulandes diferente condicion den e mesun pandemia no ta moral. Cobra e Paisnan diferente interes den e mesun Reino Hulandes ta amoral. Cobra ‘strafrente,’ pasobra Aruba no kier hala nos propio Ley di LAFT un banda, pa pasa un Ley di Reino RAFT, tambe ta amoral. Mas amoral ta, pa den e mesun Reino Hulandes placa di interes wordo gana pa Hulanda riba e necesidad di e Pueblo di Aruba cu durante un pandemia a haci uzo di artikel 36 di Statuut pa pidi yudansa.