Despues di hopi tempo di tabata keto, mi amor patrio ta pone mi cu mi tin di reacciona riba gañamento di un director di DOW cu parce ni berguenza e tin. Cu cara di palo mescos Pontius Pilato ta draai riba e stoel y ta scupi mentira tras di mentira. E sa cu eta sinta riba “hete kolen” y e sa cu lo tin hende cu por refuta delaster un di su mentiranan. No ta pornada mi a inclui su persona den mi denuncia penal contra e Santito “cobarde” Corupto Otmar!
Otmar a reta tur hende cu ta trata di daña su nomber y mi a acepta e reto y a yamé un CORUPTO na varios ocasión. Te awe mi ta sperando un “oproep” pa un caso den corte. E por a bolbe “get away with crime” cu ayudo di su amiguito ex-PG, pero dilanti huez mi lo prueba pakico mi conclusion ta cu e compra di e incinerator ta un acto corupto. Compra di un PORKERIA cu al final nos pueblo ta bai paga pe. Pa colmo awor e director kier hustifica compra di un otro PORKERIA, siendo cu e sa desde cuminsamento cu esaki ta e caso, mirando cu e mes a pone esaki den un carta, cu ta trata e uso “restfonds” di FDA pa drecha planta di RWZI na Bubali urgentemente, mirando e peliger di e planta aki.
Ta parce cu e director di DOW ta purba di na prome lugar scapa peyeho di dje, di e Ex-minister corupto, full e gobierno anterior y esun actual. Y pa colmo e ta hustificando compra di un otro incinerator cu NUNCA a cumpli.
E racha di corupcion a cuminza ora mayoria di esnan cu por a participa na destaho pa incenirator a pidi pa cancela henter e procedura. E director ni e ex-minister no a ni hiek, conforme reglanan di Good Governance y di destaho publico, pa para esaki.
Asina e ta papia di REDUNDANCY di e aparato! E sponsor mes di Ex-minister a bisa den un reunion, y esaki ta documenta den e notulanan, cu nan(CTC) NO tin esey y nan no mester di esey tampoco! Pero na e momentonan aki e incinerator NO por kima! Esaki SO mester ta un motibo pa DESCUALIFICA loke e sponsor ta ofrece, mirando cu e no a cumpli cu e bestek. Den un carta cu e director MES a manda pa e Ex-minister corupto, e ta bisa cu e aspecto di REDUNDANCY ta indespensabel y “maatgevend” den e proceso aki! Dicon “donder” bo mes a sostene e Ex-minister corupto pa cumpra e incinerator porkeria aki toch anto? Miedo? Of e ta complice?
Den e MB ta poní hopi cla cu e incenirator mester por “verwerk” 15-20 ton diariamente y no manera e director a bisa durante e conferencia di prensa!! Si e incinerator ta cumpli cu loke a acorda, facilmente e aparato mester por cumpli cu e demanda actual! Y obviamente awor NO mester bai over na cumpra un otro PORKERIA!
Pues e incinerator ta un “MISKOOP “! Y e director sa esey, pero kier purba di scapa cara di su mes y di e ex-minister Otmar door di malinforma y manipula cu cifranan INCORECTO!
Segun informacion ricibi ta cu te september 2023 e cantidad cu a yega dump ta leeuw di loke e director a trece padilanti durante e rueda di prensa. Pa loke ta trata “medisch afval” esaki te september 2023 ta 358 ton. Sinembargo den e desperdicio di e.o. hospital ta bin mas cos cu “medisch afval” y esaki pa falta di un miho control kico ta drenta. Asina mes esaki ta mucho mas abou di loke e bestek ta bisa.