Savaneta – Diamars anochi rond di 11’or y mey polis di San Nicolas ta bay cu urgencia mas pabou di Mariniers Kazerne, unda un accidente serio a tuma luga.
E accidente a sosode un caminda unda den pasado accidente(nan) fatal a yega di tuma luga.
Na yegada di polis nan a bin topa cu tres vehiculo. Tawata trata di Toyota Yaris, un v-car Chevrolet Sonic y un auto marca Volkswagen.
Dos persona a resulta herida; ambos ta hende muhe.
Un herida tawata den e Yaris y e otro den e Volkswagen.
Na yegada di Polis di Trafico agentenan cu a yega prome a splica nan colega di trafico locual a sosode.
Despues di esey chauffeur di e v-car cu ta un cabayero Hulandes a wordo acerca door di polis; unda cu algun rato despues di scucha su version polis usa e Alco-Sensor.
E resultado tawata cu e la surpasa e limite di alcohol stipula pa ley, y eynan mes e la wordo deteni.
Transportwagen a wordo pidi pa buske y hib’e warda di San Nicolas.
Pa locual ta e heridonan, dos ambulance a presenta y un Rapidresponder, esnan herida a wordo transporta pa Hospitaal.
Caminda a permanece cera pa basta rato; unda cu Takelwagen cu a yega mester a move e autonan y e auto cu a ocasiona e accidente aki cu ta e Chevrolet Sonic blauw a wordo hiba warda di Santa Cruz pa mas investigacion.
