Pueblo di Aruba y principalmente esnan cu ta biba na San Nicolas, prepara pa ricibi un tremendo regalo musical diadomingo awor, 8 di october! E banda musical Mericano “Christafari”, conoci internacionalmente pa su musica gospel estilo reggae, y cu ta consisti di hende homber y muhe di diferente continente, pais y cultura, lo brinda pueblo di Aruba un concierto completamente gratis! Tur hende ta bon bini na e concierto aki cu lo tuma luga riba parkeerplaats di Arubus na San Nicolas di 6:00 p.m. pa 9:00 p.m.
E banda Christafari ta existi desde 1989. Nan ta yama nan mes “musicianaries” (musical missionaries) o sea misioneronan musical, cu ta plama e mensahe di speransa y salbacion rond mundo pa medio di giranan intensivo. Nan a ministra den 85 pais y recientemente nan a tour algun pais na Africa. Miembronan di e banda Christafari ta creyentenan firme y den nan musica nan ta presenta mensahenan cu ta toca curason di hopi hende y ta transforma bida. Algun di nan canticanan hit mas recien ta “I Speak Jesus” y “Arise and Shine.” Por scucha mas di nan musica via YouTube.
Christafari lo ta na Aruba e fin di siman aki pa ministra na e pueblo di Aruba, cuminsando cu e Congreso Hubenil Aruba dia 6 y 7 di october. Nan ta clausura nan estadia na Aruba cu e gesto bunita di un concierto gratis riba parkeerplaats di Arubus na San Nicolas diadomingo 8 october 2023 di 6’or di atardi pa 9’or di anochi. No perde e oportunidad unico aki!