Macuarima – Diaranson anochi den careda di 9’or pasa unidad policial y tambe ambulance a bay dilanti Shahai Take Away, unda auto a alcansa un persona.
Esnan cu a yega prome ya por a nota cu e peaton ta gravemente herida. Paramediconan na yegada, ya no por a mucho mas y a pidi pa Dokter.
Testigo
Na e sitio nos a papia cu esnan cu a mira locual a sosode. Segun nan version, e homber lo a bay pa crusa y lo no a mira e Suzuki Swift color shinishi biniendo di nort.
“E impacto a zona manera klapchi” e testigo a bisa nos. E auto mes a sigui core y bay para meternan leu di unda e la dal e peaton.
Siguientemente relato di Vocero di polis Sr. Laclé.
“9.09 di anochi central di polis ta wordo notifica cu tin un accident caminda auto lo a dal un peaton na altura di Shahai Take Away.
Ta despacha patruya policial, bombero y ambulance cu maximo urgencia na e sitio di acidente.
Na yegada di patruya por a constata cu e peaton no ta duna señal di bida.
Pa 9.45 or di anochi dokter Scholten ta constata morto di Esteban Maduro, naci na Aruba 2 januari 1942.
A pidi specialista di trafico como tambe polis tecnico na e sitio pa haci nan investigacion.
Cuerpo Policial Aruba ta manda palabra di condolencia na famia di e fayecido”.
