Durante un conferencia di prensa cu a tuma luga awe tardi, Aruba Tourism Authority (A.T.A.) hunto cu Ban Serio! a anuncia nan campaña Aruba Limpi, reforsando asina nan compromiso pa un isla mas limpi y sostenibel. Bou di e lema “Un Aruba dushi pa biba, ta un Aruba dushi pa bishita”, A.T.A. ta spera di por concientisa y encurasha comunidad pa hunto nos tuma accion pa yega na un Aruba mas limpi.
E campaña Aruba Limpi ta un extension di e iniciativa Limpi Limpi cu a keda introduci pa Ministerio di Naturalesa na luna di juli ultimo. E meta principal ta pa crea conscientisacion tocante limpiesa di nos isla, adresando un tema cu ta di suma importancia pa nos residentenan como tambe nos bishitantenan. Door di educa comunidad local tocante nos responsabilidad y conducta pa cu nos medio ambiente, ta busca pa crea impacto duradero cu ta beneficia tur hende y futuro generacionnan.
E campaña lo tin un duracion di 3 luna y lo stimula comportacion responsabel pa medio di diferente iniciativa, incluyendo e oportunidad pa gana un aña gratis di coleccion di desperdicio residencial na final di e campaña. Adicionalmente, e campaña lo traha hunto cu diferente organisacionnan no-gubernamental, di entre otro Scubble Bubbles, pa organisa actividadnan di limpiesa na nos playanan y na otro sitionan/ districtonan tur rond di nos isla. Hunto cu Ban Serio, lo traha riba iniciativanan special pa crea consientisacion cerca nos muchanan y hobennan. Den luna di november, scolnan por participa den e campaña di Aruba Limpi door di graba un mensahe y asina tin chens di gana un aña di limpiesa pa nan scol.
E lema di e campaña ta un expansion di e vision di e directora anterior di A.T.A., señora Myrna Jansen. “Un Aruba dushi pa biba, ta un Aruba dushi pa bishita” ta un sentimento sincero di nos pueblo cu ta refleha e gratitud pa e industria di turismo. Na mesun momento, e lema ta recorda nos cu e calidad di bida di residentenan ta bay man den man cu e calidad di experencia di nos bishitantenan.
“Nos ta kere cu un Aruba limpi no ta solamente un deber: e ta un refleho di nos amor y compromiso pa nos isla stima. Door di uni forsa den e campaña aki, nos por haci un impacto significante y crea un futuro mas sostenibel pa Aruba” tabata palabranan di Ronella Croes.
Tocante Ban Serio
“Ban Serio” ta un iniciativa cu ta pone enfasis riba e cuater pilarnan principal di turismo, esta Medio Ambiente, Hospitalidad, Cultura y Seguridad. Door di inclui Ban Serio den e campaña aki, A.T.A. ta busca pa conecta cu generacionnan mas hoben y subraya e importancia di preservacion di medio ambiente como un pilar pa e industria di turismo di Aruba.
Pa mas informacion tocante e campaña, por bishita medionan social: Aruba Limpi. A.T.A. ta extende un invitacion na comunidad pa traha hunto pa un Aruba mas limpi, mas responsabel cu ta mas dushi pa biba y mas dushi pa bishita.