Di robes pa drechi: Mirla Rasmijn, Compliance Officer Post Aruba N.V. – Minister Ursell Arends, Jeanrick Arends, ganado den categoria di fotografo amateur, Meliza Lopez, ganado den e categoria di fotografo professional, Tyson Lopez, CEO Fundacion Parke Nacional Aruba
ARUBA, ORANJESTAD – 29 SEPTEMBER 2023 — E splendor impresionante di nos naturalesa frecuentemente ta un fuente di inspiracion pa diferente artista y fotografo na Aruba. Cu sumo placer awe ta anuncia e ganadornan di e ‘Nature Photography Competition’, cu e tema ‘Flornan Nativo di Aruba’, un concurso anual di fotografia di naturalesa cu ta un colaboracion entre Fundacion Parke Nacional Aruba y oficina di Servicio Postal di Aruba, Post Aruba N.V. E evento pa celebra e ganadornan, a tuma lugar Diaranson, 27 di September den Hofi Shon Shoco situa na Parke Nacional Arikok.
E ‘Nature Photography Competition’ ta trece un oportunidad unico pa fotografo cu tin pasion pa naturalesa descubri con maraviyoso y diverso Aruba su biodiversidad di flor ta y alabes ta duna engrandecemento na nan talento. Aruba su biodiversidad ta impresionante y su flornan nativo a keda central den e competencia di fotografia aki.
Potret di Meliza Lopez titula ‘Love on a Stamp’
Potret di Jeanrick Arends titula ‘Dama di Anochi’
E competencia aki ta pa conscientisa y educa e comunidad di Aruba riba e importancia di proteha, preserva y restaura Aruba su mata y flornan nativo cu ta forma parti di e Arubiano su identidad y herencia natural. Fuera di esey, tambe e ta un oportunidad pa expresion artistico usando Aruba su naturalesa como inspiracion.
Pa duna e concurso aki un toke special, nos ta orguyoso di comparti nos colaboracion cu Post Aruba N.V. E ganado lo tin su fotografia imprimi riba stampia postal di e luna di September. Esaki ta un manera di inmortalisa e obra di arte na papel y laga mundo henter disfruta di su bunita imagen.
Pa brinda e comunidad di Aruba e oportunidad di aprecia e arte aki di cerca, Fundacion Parke Nacional Aruba lo exhibi e fotografianan den un forma di un ‘traveling exhibition’ cu lo ta disponibel pa un aña na diferente puntonan di interes manera Parke Nacional Arikok, hotelnan, diferente plazanan, centro di compras y mucho mas.
E ‘Nature Photography Competition’ ta duna oportunidad na tur fotografonan local pa por participa, di fotografonan acredita, studiantenan y muchanan.
Pa mas informacion tocante e evento aki, por tuma contacto cu [email protected]