ORANJESTAD – Diahuebs mainta, Prome Minister Evelyn Wever-Croes hunto cu Minister di Cultura Xiomara Maduro, Parlamentario Darlaine Guedez – Erasmus, representantenan di DOW, y representantenan di e comicion Aruba Amenities, tabata presenta na Ayo Rock Formation pa participa na comunidad en general cu fase 1 di e proyecto di renobacion di parke Ayo a wordo completa.
Durante su discurso, Prome Minister a splica cu e idea di e proyecto aki a cuminsa despues di pandemia, na momento cu a realisa cu pa nos pueblo tin un bida mas saludabel, lo mester crea mas opcion pa loke ta actividadnan pafor di cas. Pa por realisa e idea aki, a crea un comicion yama “Aruba Amenities” consistiendo di departamentonan di gobierno, y instancianan semi-gubernamental, cu a cuminsa traha riba algun proyecto di cual Ayo ta un di nan.
Awe, despues di un aña cu a inicia e trabounan di renobacion, Gobierno hunto cu tur partners envolvi, por anuncia cu e prome fase di e proyecto di Ayo a keda completa, pa tanto e comunidad di Aruba y nos bishitantenan por disfruta di dje. E comicion di Aruba Amenities a haci un trabou urgente pa mitiga e problemanan principal, y despues a traha riba planificacion di e trabou pa renoba diferente area di e parke.
Pa loke ta encera e trabounan di fase 1, a renoba e caminda di cana, a pone railsnan di metal pa siguridad riba e ruta aki, a renoba e dak di e cabañanan, a traha un brug na e parti caminda e rooi ta drenta den Ayo, a pinta e tralienan cu tin cu ta proteha e dibuhonan di indjan, y finalmente a logra traha borchinan nobo. E borchi na entrada ta identifica Ayo, e otro ta yama Bon Bini na tur bishitante, y ta duna mas informacion y direccion di e ruta pa e bishitantenan sa den ki direccion pa cana. Parke Ayo ta un luga hopi bishita pa nos turistanan y ta brinda un experiencia unico, cu ta un combinacion di un experiencia geologico, historico, y botanico. Pa e siguiente fasenan, lo sigui cu atencion na e contenido di e aspectonan aki, y duna mas contenido na cada un di nan.
Prome Minister ta gradici y felicita e comicion di Aruba Amenities, tur e departamentonan di Gobierno y instancianan no gubernamental y semi gubernamental cu a traha pa haci e proyecto aki un realidad. Danki na e dedicacion y pasion di e deparatmento di DOW, DIP, DNM, MANA, ATA y Ministerio di Cultura, pa traha na cuida y mehora e patrimonio di nos pueblo di Aruba y nos facilidadnan publico. Ta danki na boso esfuerso y amor pa e dushi baranca aki, awe Gobierno por anuncia e grato noticia aki.
E BARANCANAN DI AYO TA E SIMBOLO DI FORTALESA Y CARACTER DI NOS PUEBLO, NO TIN NADA PA KIBRE
“Poco dia pasa mi tabata na Eagle Beach admirando e obra bunita di driekiel, cu mi ta considera como un simbolo di resiliencia y forsa. Awe nos ta para na e barancanan gigantesco di Ayo, cu mi ta califica como e simbolonan natural di e fortalesa y e caracter di nos pueblo, y manera mi ta bisa; no tin nada pa kibre. E lugar aki ta hopi special, y ta recordami hopi na tempo mi tabata mucha, e tabata un luga special pa un buitendag, fiesta, of just pa pasa dia cu famia. Pesey awe, mi kier invita pueblo en general pa tuma un poco tempo pa famia y bishita e parke aki pa admira e renobacionan cu a wordo haci, y alabes crea momentonan involvidabel. Ta importante si, pa mantene e luga limpi y agradabel pa asina nos por ofrece nos turistanan tambe un luga bunita pa bishita” Prome Minister a expresa.
