Piedra Plat:
Diaranson den careda di 11’or di anochi a sosode un caso di Hit and Run. Un Auto blanco di marca Toyota, maneha pa un cabayero a bira victima di hit and run. Na altura di e brug di Piedra Plat un auto desconoci no a controla su velocidad ta tempo y a dal patras di e Toyota.
E impacto tabata hopi fuerte cu e Toyota a wordo benta riba e acera y a haya hopi daño material. E chauffeur di e auto cu a ocasiona e accidente no a para pa su responsabilidad, pero a djis sigui core bay for di e sitio.
Mesora a pidi pa presencia di polis, polis di distrito di Santa Cruz y polis di trafico a presenta na e sitio. Polis a cera e caminda pa asina por haci e investigacionnan necesario. Probablemente e auto cu a hit and run tambe lo mester tin basta daño material.
E caso aki di hit and run ta den man di autoridad pa mas investigacion.
