Santa Cruz – Diahuebs den orannan trempan di mainta trafico a stagna ariba e caminda di Santa Cruz.
Polis a wordo manda cu urgencia poco pariba di Maiky’s na Hooiberg pa un auto cu a bolter y bay cay den rooi.
A pidi mesora tambe pa materiaalwagen debi cu e chauffeur un dama lo a keda pega den e vehiculo.
Bomberonan na yegada a haci nan parti y despues cu e saca e dama a pas’e over pa e Paramediconan, cu tawata cla para pa tuma e victima.
Momento cu e accidente a sosode tawata net un ora druk, unda esnan cu mester a bay traha y hiba yiu scol tawata trafica ariba e caretera.
Momento cu e dama tawata wordo hinca den ambulance no por a mira heridanan visibel na su curpa, un indicacion cu probablemente e lo tawata tin su seat belt bisti. Esaki lo por a contribui cu e la haya menos golpinan fuerte.
No ta conoci pa nos; kiko lo por a ocasiona cu e dama a perde control completo ariba su auto y bay termina den e rooi cu tur e consecuencianan cu esaki por tawata tin cu ne.
