Shiribana – Diadomingo mey anochi dilanti Subway na Shiribana; conoci como Subway Paradera ta sosode un accidente serio di trafico.
Na e sitio nos a combersa cu un habitante y e la conta con nan a scucha un zonido masha duro mes, y momento cu nan a sali a bin topa cu e autonan kibra. Na prome reaccion, lo tin hende gravemente herida.
Locual a sosode
E dos vehiculonan envolvi ta un Hyundai i10 y un Ford.
Segun informacion na e sitio, e i10 lo a bay pa subi caminda dilanti Loxing Supermarket cu ta ey serca mes di Subway.
Mientrastanto e Ford tawata biniendo cu velocidad halto for di direccion di Tanki Leendert pa Paradera.
Y aki ta unda e ta dal e i10 bent’e den e parkeerplaats di Subway.
Chauffeur di e i10 cu ta un empleado di Subway cu a caba di labora a resulta herida y tawata tin mester di asistencia medico.
Nos por a mira dos ambulance na e sitio.
Un cantidad di piesa di ambos auto a keda gespart ariba un distancia di por lo menos 30 meter.
Caminda a wordo cera den ambos direccion, pa asina polis di trafico por haci su investigacion.
Un accidente cu sigur por a termina facilmente den un tragedia; debi na velocidad halto.
