Oranjestad, Aruba – 21 september 2023 – Riba 13 di september, ELMAR a presencia un record peak di carga (load) di coriente di 144.5 megawatts, y riba 14 di september, nos a presencia un otro peak remarkabel di 146.4 megawatts. E record aki a wordo kibra un bes mas riba 15 di september, ora e peak a yega un record nobo di 151.1 megawatts.
E averahe den demanda di electricidad na Aruba ta 98.3 MW, pero manera tur aña, e luna di september ta e luna di mas calor di aña unda nos ta presencia e peak di carga. Aña pasa, e peak di carga (load) di coriente di aña tabata 137.6 megawatts. Na 2021 e peak di aña tabata 128.1 megawatts y na 2020 e peak di aña tabata 121.9 megawatts.
E peaknan consecutivo den demanda di electricidad durante e ultimo añanan durante september ta un señal cla di e retonan creciente cu nos ta enfrenta debi na cambio di clima y e temperaturanan cu ta subi constantemente.
E efectonan di cambio di clima ta indudabel, y nos, como isla, ta presencia e cambionan aki na prome fila. E temperaturanan creciente no solamente ta afecta nos bida diario, sino tambe ta pone un stres significante riba nos infrastructura di energia. E aumento rapido di consumo di coriente durante un heat wave tin su impacto riba e red di distribucion.
No obstante e retonan, nos ta orguyoso pa sirbi Aruba, un comunidad cu ta ricibi un di e prijsnan di coriente mas economico den Caribe. Tur cliente residencial na Aruba actualmente ta paga un prijs mas abou cu e prijs di costo di electricidad.
ELMAR ta dedica na provee suministro di coriente confiabel y sostenibel pa satisface e necesidadnan creciente di nos comunidad, mientras nos ta sigui traha diligentemente pa mitiga e impacto ambiental di nos operacionnan. Continuamente ELMAR ta inverti den expansion di transformer di 7MW pa aña y expansion di kabel di distribucion di 6KM pa aña.
Nos ta experiencia e efectonan di cambio di clima continuamente, e ta crucial pa nos tur traha hunto pa reduci nos ‘carbon footprint’ na mundo y sigura un futuro sostenibel pa nos tur na mundo. Mientras ELMAR ta mantene su compromiso pa ofrece electricidad accesibel na e habitantenan di Aruba, nos kier stimula nos clientenan pa ta mas consciente di nan consumo di coriente. Cada esfuerso pa reduci consumo di coriente, manera paga luz ora nan no ta den uzo, isolacion adecua di casnan, y uzo di aparatonan eficiente di energia, por haci un diferencia.
ELMAR ta mantene su dedicacion na nos mision di provee coriente confiabel, accesibel y sostenibel na Aruba.