Heart-Centered Leadership Foundation (HCLF) ta anuncia di dos aña di nan proyecto ‘Curason pa Curason’ cu ta conscientisa hoben y adulto entre (13 – 29) tocante salud mental y resiliencia mental na Aruba. E meta di e proyecto aki ta pa normalisa combersacionnan tocante salud mental unda e proceso aki por yuda ekipa hobennan cu mas conocemento y habilidad pa sostene nan resiliencia mental.
E prome aña di e proyecto a core durante aña escolar 2021 – 2022. HCLF a colabora cu 4 school secundario na San Nicolas unda a logra brinda tayer y sesionnan interactivo riba tema di resiliencia mental na 225 alumno. HCLF su programanan den e proyecto aki ta crea un espacio confiabel y sano unda cu hobennan ta sinti comfortabel pa dialoga tocante aspectonan den nan bida diario cu ta afecta nan salud mental na manera positivo y negativo. Esaki ta sosode den grupo cu otro alumnonan, cual ta duna hobennan mas confiansa pa expresa nan mes y ta reduci e taboo di e tema aki.
Pa guia y sostene e proceso aki den grupo, HCLF tin un grupo di boluntarionan adulto entre 18 – 29 aña: Heart-Centered Impact Coaches. E HCICs ta ricibi training riba area personal y profesional pa asina nan por tin e capacidad pa comunica, stimula motivacion y apoya e hobennan pa forma conexion y combersa libremente tocante e tema di resiliencia mental. Pa HCLF por continua cu e proyecto di Curason pa Curason e aña aki, fundacion ta buscando mas boluntario adulto pa yuda facilita combersacionnan den grupo cu hoben riba tema di resiliencia mental durante nan actividad.
Curason pa Curason a cuminsa bek oficialmente den juni 2023 y tin planea pa sigui core te cu mei 2024. HCLF lo ta expandiendo nan partners cu varios school secundario nobo y lo ta organisando tayernan pa publico. E obhetivo ta pa alcansa 350 hoben, pa asina por sigui conscientisa y yuda hobennan reconose e importancia di salud mental y resiliencia mental.
Si bo ta un adulto cu ta gusta duna bek na comunidad y ta interesa den sigui desaroya personalmente y profesionalmente, por tuma contacto cu HCLF na 5841211 (WhatsApp), por bishita nan Facebook HCLFoundation of por manda nan un email na [email protected]. Registracion ta sera 30 di september 2023. Pa lesa mas tocante di proyecto Curason pa Curason por bishita https://www.hclfaruba.org/curasonpacurason
onder Beschermheerschap van
de Gouverneur van Aruba
HCLF su proyecto Curason pa Curason ta posibel danki na fondo parcial di Fonds 21.