E compania profesional di Merca AstroTurf a presenta nan trabou na Minister di Deporte.
ORANJESTAD: Recientemente, Minister di Enseñansa y Deporte Endy Croes a haci un “sight visit” na Compleho Deportivo Guillermo Prospero Trinidad na Dakota. Manera ta conoci, e stadion na Dakota ta den proceso di renobacion desde algun luna atras. Tin hopi trabou ta tumando luga na e stadion y ta trahando cu ful swing pa por keda cla completamente cu e trabou e aña aki. Un compania profesional di Merca a bin Aruba pa a aloca e yerbe artificial nobo na Compleho Deportivo Guillermo Prospero Trinidad. Diahuebs ultimo, e compania profesional AstroTurf a finalisa cu nan trabou y entrega Minister Endy Croes un certificacion cu garantia di ocho (8) aña pa e trabou cu nan a haci. Tambe presente na e ocasion special aki tabata Ministerio di Deporte e representantenan di Fundacion Facilidadnan Deportivo (FFD) y e empleadonan cu a haya training pa e mantencion di e yerbe artificial. Otro siman e representantenan di FIFA lo ta na Aruba pa certifica e trabou aki. Minister Endy Croes ta gradici AstroTurf pa e trabou sublime cu nan a haci. Sigur cu esaki ta un tremendo noticia pa nos deportistanan y pa e federacion di futbol. Masha pabien Aruba!
