Riba dia 1 di september Minister Maduro a entrega e concepto di Ley di Presupuesto 2024 na Parlamento. Hunto cu e presupuesto a entrega tambe un Nota di Presupuesto 2024 cu e meta pa brinda mas transparencia financiero.
E Nota di Presupuesto ta duna un bista general di e Presupuesto 2024 manera presenta na Parlamento di Aruba dia 1 di september 2023. E intencion ta pa duna informacion na comunidad di Aruba riba e pasonan cu ta ser tuma pa Gobierno pa yega na un finansa publico sostenibel riba termino largo.
Den e Nota di Presupuesto por mira e cifranan cardinal di Presupuesto 2024, ta duna un bista di e perspectiva di economia y di inflacion, ta splica tambe riba e normanan financiero pa saldo financiero, gastonan di personal y nivel di debe. Banda di esaki ta duna un bista riba desaroyo di entrada y gasto compara cu e aña anterior y ta duna bista di e ehecucion di e Landspakket.
E informacion den e Nota di Presupuesto ta yuda pa Parlamento y Pueblo en general por hiba un debate riba finansa publico di nos Pais basa riba e cifranan real. E Nota di Presupuesto 2024 por wordo mira riba www.gobierno.aw.
