Prome Minister Evelyn Wever-Croes tawata presente na e celebracion di 70 aña di Stichting Arubaanse Muziekschool na unda el a duna un discurso gradiciendo tur esnan cu di un of otro forma ta haci posibel pa e existencia di e scol y pa crea bon musiconan na Aruba.
Stichting Arubaanse Muziekschool a wordo funda na aña 1953 despues cu e director di Cultureel Centrum Aruba (C.C.A.) di e tempo ey, Sr. Folkert Steenmeyer a haci un anuncio na un radio conoci na Hulanda cu e intento pa haya docentenan di musica bin Aruba pa duna les. Aki, un tal Sr. Arie Born, un docente di piano Hulandes a tuma e iniciativa aki di bin Aruba pa duna les di piano. Bao guia di Cultureel Centrum Aruba, a forma e scol di musica Arubano cu tabata resorta directamente bao di Cultureel Centrum. E tempo ey a nombra Sr. Born mes como director di e scol. Sr. Born a cuminsa duna les na 1951 na su cas mes.
For di comienso a cuminsa atrae fondonan pa paga e maestronan y a logra haya sosten financiero for di diferente compania entre otro Refeneria Lago Oil & Transport Company. Gobierno Insular di e tempo ey tambe tabata contribui cu loke tabata por. E fondonan aki a contribui cu lesnan tabata wordo ofreci den tur bario na Aruba y na cas di e studiante.
Awor pa hopi aña caba e unico subsidio cu e scol ta ricibi ta di Gobierno. E subsidio aki, a pesar cu e ta cuantioso, no ta suficiente, y e diferencia ta wordo cubri cu entradanan di lesgeld. Esaki ta haci cu e scol ta financieramente solido.
“Nos Gobierno, mescos cu Gobiernonan prome cu nos, a mira y ta mira e importancia den crea musiconan na y pa Aruba, e importancia di mantene nos tradicionnan musical, nos musica crioyo, y tambe pa nos tin musiconan pa crea otro tipo di musica pa nos Arubianonan. Gustonan ta varia, pero e musico cu ta wordo crea por cumpli cu tur. Nos mester di nos musiconan local. Musica ta bida, musica ta trece ALEGRIA”, Prome Minister a expresa.
Prome Minister a remarca cu e mes tambe ta bin di un famia musical y varios miembro di su famia a acudi na Arubaanse Muziekschool pa nan preparacion musical. Un familiar sigur hopi conoci na Aruba ta Hildward Croes (QEPD). Danki na e preparacion cu el a ricibi na e scol aki, cu e por a sigui su estudio musical den exterior. Y ta hopi nos por menciona cu ta ex-alumnonan di e scol aki cu a bira musiconan grandi.
Varios docente actual y ex-docentenan, ta personanan cu a haya nan preparacion na Arubaanse Muziekschool. E ultimo director di e scol cu a laga un legado atras, Sr. Chucho Hoek den feliz memoria, tambe tawata un studiante na e scol di muscia. Y esaki ta e bunitesa di e scol. E ta crea personanan cu ta bin bek pa dedica nan arte na nos comunidad creando cancionnan nobo, aregla cancionnan pa nos cantantenan y pa gruponan musical.
“Como Gobierno, pero tambe como un yiu di tera, mi ta hopi orguyoso di tur loke Muziekschool a logra pa Aruba, di tur cu ta cu Muziekschool ainda, y esnan cu den pasado tabata cu Muziekschool. Y sin lubida, tur otro cu a y ta coopera pa tene e scol aki na bida. E ta un esfuerso grandi locual boso ta haciendo, pasobra nos sa cu e no ta facil, pero e ta necesario si. Danki di curason”, Prome Minsiter a expresa.
Y na final di su discurso, Prome Minister a remarca: “Laga e scol aki ta un ehempel di con un solo persona ta pone un bala lora, y ta touch e curason di miles di ciudadano, y awe 70 aña despues ainda e bala ta lorando. Pues nunca perde speransa pa lansa bo idea… bo no sa nunca cuanto tin eyfo cu por yuda bo realisa esaki.
Den nomber di gobierno di Aruba, mi ta felicita tur esnan responsabel pa e porvenir y bienestar di e scol y e stichting, hopi hopi mas aña di aniversario y sigui crea mas artista pa nos dushi Aruba”.
