Un Aruba sin cuido di mucha, no ta algo cu nos por imagina mas. Cuido di mucha ta importante pa tur hende; mayornan, gobierno, comercio y comunidad. Desde añanan 70 debi na e desaroyonan socioeconomico, e pedida pa cuido di mucha a crece gradualmente y particularmente, cuido di mucha di bon calidad. Pa mayoria famia awendia, trabou ta indispensabel, mirando costo di bida como tambe e crecemento macroeconomico continuo. Cu esaki den mente y a base di hopi rapport, Gobierno a institui: Departamento di Mucha y Hoben (DMH), cu ta encarga cu ehecucion di maneho, registracion, duna permiso, supervision y ehecucion di Ordenansa Nacional Centro di Cuido di Mucha (AB. 2017. Nr 38).
Tratado Internacional di Derecho di Mucha
Cu implementacion di e ley aki finalmente Aruba, cu a ratifica e Tratadonan di Derecho di Mucha (IVRK) for di 17 di januari 2001, porfin ta cumpli cu e Tratado. Ta trata particularmente articulo 18, inciso 3, cu ta stipula cu un Nacion cu ta partido na e IVRK aki, ta obliga pa tuma tur medida necesario pa sigura cu e yiunan di e mayornan cu ta traha, tin e derecho pa haci uzo di servicio y facilidad di cuido di mucha, pa cual nan ta bin na remarca.
Banda di esaki articulonan 3, 6 y 12 di IVRK ta hunga un rol mas den e sentido general. Articulo 3 ta indica cu Gobierno mester promove e bienestar di tur mucha y mester supervisa tur facilidad pa cuido y proteccion di mucha. Articulo 6 ta papia di e siguransa di e desaroyo di e mucha door di e gobierno y articulo 12 ta trata e derecho di participacion y e derecho di e mucha pa ta scucha.
E lineanan principal di e ley
E ley ta dirigi su mes na tur instancia priva y e personanan individual cu ta ofrece cuido di mucha y pa fiha e regulacionnan di calidad pa e doñonan. E cumplimento y aplicacion di e regulacionnan akin a prome instancia ta den man di e doño mes, pero mester ta sincronisa cu e caracter di e ley, como un ley di cuadro den cual e normanan mas importante di siguridad y promocion di e calidad di cuido di mucha ta inclui.
Cuido responsabel
Di un doño/propietario ta spera cu e ta ofrece cuido responsabel, na un manera eficaz y oportuno y cu ta contribui na un bon desaroyo y sano di e mucha den un ambiente safe y sano (articulo 9 y 10). E doño/propietario ta provee esaki cu personal y material cu ta adecua den sentido cuantitativo y cualitativo.
Mirando e panorama amplio aki di e ley, DMH ta brinda sosten y guia den e fase di transicion aki, pa conhuntamente alcansa e metanan necesario pa yega na un regulacion legal y husto. E desaroyonan den pasado ta ilustra un crecemento desenfrena a tuma lugar den e cuido di mucha. Riba website di DMH, www.dmh.aw por encontra mas informacion balioso, como tambe e prome registro nacional di e 81 centronan di cuido cu a registra prome cu 31 di maart ultimo.