Diabierna den careda di 11’or y mey di mainta un casita di un pareha di edad a keda completamente destrui pa un candela feroz, e pareha a perde tur nan pertenencianan den e candela aki. E pareha a wordo tranporta cu ambulance pa hospital mirando cu nan ta hende di edad y tambe lo ta delicado di salud. Un personal di brandweer tambe a keda herida pa un plaachi zim cu lo a cort’e na su man.
Modanza:
Diabierna den oranan di mainta, un pareha di edad bibando den un casita di palo, a pasa e susto di nan bida. Tabata den careda di 11’or y mey na momento cu un señora cu tabata di bishita cerca e pareha a cuminsa haya holor fuerte di candela. E señora hopi atento mesora a bay patras di e cas pa mira kiko lo por ta kimando, patras di e cas riba e tereno tin un persona ta traha of drecha muebles, aki e la bin topa cu un candela basta grandi, e persona cu tabata trahando den e cuarto patras di e cas, a bise cu algo den un glas lo a pega candela.
E candela hopi lihe a cuminsa expande. E vlamnan rapidamente a podera di e casita. No a keda e señora nada otro cu mesora saca e pareha for di nan cas y hibanan den su auto. E la para e auto un poco mas leu caminda e pareha por ta safe. Mientras e tabata batiendo alarma mas hende a cuminsa yega pa mira kiko nan lo por yuda cu ne. Un trahado di DOW cu tabata riba caminda a mira e huma preto grandi, e tambe a core bin yuda.
For di leu por a mira e huma preto enorme di e candela. Brandweer y polis hopi lihe a yega na e sitio y a cuminsa combati e candela enorme aki. Mirando cu tabata trata di un pareha di edad, a pidi ambulance pa haci un control medico cu nan. Na yegada ambulance a trata nan na e sitio y despues a haya toch necesario pa transporta nan pa hospital pa un checkeo medico mas avansa.
Varios unidad di polis a presenta na e sitio tambe a cera e caminda pa trafico. Dos truck di brandweer tabata na e sitio pa combati e candela. Mientras cu nan tabata combatiendo e candela un personal di brandweer a corta su man cu un plaachi zim y mester a haya asistencia medico di e paramediconan di ambulance.
Un bon trabou di brandweer cu hopi lihe a sa di domina e candela pa e no sigui expande y a paga esaki por completo. Pero lamentabelmente e pareha su cas a kima por completo y a perde tur, pero tur nan pertenencianan, nan a keda cu solamente locual nan tabata tin bisti na cas den e oranan di mainta aki.
