ORANJESTAD: Dialuna ultimo durante reunion publico di Parlamento di Aruba, a trata Presupuesto Supletorio 2023 di Pais Aruba. Minister di Enseñansa y Deporte Endy Croes a contesta pregunta di e parlamentarionan durante su desertacion. Minister Endy Croes a indica cu e reduccion di post personal di Instituto Pedagogico Arubano ta pa Presupuesto 2023 solamente y no ta structural. E suma di AWG. 350 mil ta basa riba algun empleado cu a bay cu pensioen y no a wordo reemplasa ainda. Tambe, Minister Endy Croes a duna splicacion di e suma cu a aloca pa Departamento di Enseñansa (DEA). A aloca esaki pa algun proyecto di DEA, entre otro, Desaroyo y Revision di Metodo pa Maneho di Idioma Nobo. Ademas di esaki, Minister Endy Croes a elabora riba e aumento di subsidio di e scolnan. E mandatario di Enseñansa a indica cu usualmente gasto di awa y coriente di tur scol ta wordo paga via Directie Infrastructuur en Planning (DIP). Actualmente cada scol ta bay haya e suma cu nan mes tin cu paga gasto di awa y coriente y e scolnan cu ta haya subsidio mester bay paga esaki via e “exploitatiekosten” cu nan ta haya.