Desde e momento cu Minister Xiomara Maduro a asumi e responsabilidad como Minister di Finansa hunto cu su ekipo di profesionalnan a bin ta traha pa drecha y sana e finansa publico di nos Pais Aruba. A traha den consulta continuo cu institutonan internacional manera e.o. IMF, Banco Mundial pa asina haya e conseho y guia pa mehora nos presupuesto nacional, como tambe a bin ta traha di cerca cu e supervision financiero di CAFT y e acuerdonan den Landspakket. Tabata trabaonan cu a exigi hopi esfuerso y dedicacion pa por yega cada bes na un miho resultado. Ademas a bin ta traha na productonan nobo hunto cu e presupuesto pa asina brinda mas informacion y transparencia na Parlamento di Aruba y comunidad. A bin ta presenta cada kwartaal e Uitvoeringsrapportages URK, e Nota di Comienso di Aña y e Cambio di Presupuesto, asina brindando mas splicacion con e fondonan publico ta wordo usa. Minister di Finansa y su ekipo di expertonan a bin ta traha pa baha e debe di Pais Aruba, aumenta nos entrada y yega na surplus cual ta necesario pa por mehora nos finansa publico, contrario na gabinetenan anterior cu a hiba un maneho cu presupuestonan ficticio y deficit hopi grandi cu hinca nos pais den debenan astronomico cu tur e consecuencia cu esaki a trece cune. Na 2020, e logra cu por a presenta un presupuesto cu un surplus, pero e pandemia a ocasiona cu e situacion a cambia totalmente. Pero apesar di esey a sigui traha duro y den menos cu 3 aña ta logra presenta un presupuesto cu surplus na 2023. Pa e presupuesto pa aña 2024 e trabaonan a wordo haci y a cana su procedura pa awe por a keda cla cu por a firma Presupuesto 2024 pa Pais Aruba. Esaki lo wordo entrega diabierna awor di 1 di september 2023 na Parlamento di Aruba y asina por inicia e ciclo di su tratamento den Parlamento. Minister di Finansa ta indica cu esaki ta e di dos presupuesto di nos Pais cu ta wordo entrega na tempo conforme ley, y e di dos presupuesto cu ta conta cu un surplus. Presupuesto 2024 ta wordo acompaña pa un producto nobo, cual ta Nota di Presupuesto 2024. Esaki ta duna un bista en general di e contenido di Presupuesto 2024 y ta yuda Parlamento compronde miho con e presupuesto ta hinca den otro. Como tambe esaki ta mas transparencia financiero pa pueblo. E presupuesto lo wordo entrega diabierna awor na Presidente di Parlamento y despues Minister di Finansa lo tin un conferencia di prensa pa brinda mas informacion y splicacion tocante Presupuesto 2024. E mandatario ta gradici su coleganan minister y e team di experto di Gobierno di Aruba cu a traha incansabel y ta demostra tur dia nan amor pa Aruba. Minister Xiomara Maduro ta kere den Aruba, e mandatario ta kere den e potencial di nos hendenan y ta gradici Dios semper pa e sabiduria, forza y pasenshi cu su persona ta bendiciona cun’e.
