Home » Minister Ursell Arends ta lansa Campaña Nacional Limpi Limpi

Minister Ursell Arends ta lansa Campaña Nacional Limpi Limpi

by Admin
0 comment 163 views

Durante conferencia di prensa dia 22 di augustus 2023, Minister di Naturalesa, Sr. Ursell Arends a lansa e continuacion di e campaña nacional di conscientisacion di desperdicio cu a cuminsa na principio di aña.

E meta ta pa amplia e actividadnan cu ta duna forma na nos balor y normanan cultural den cuadro di maneho di desperdicio. E campaña tin tres obhetivonan prinicipal:

  • Conformidad cu APV(Algemene Politie Verordening)

E cumplimento di ‘Algemene Politie Verordening’ ta esencial pa e prevencion di sushamento y e creacion di dumpnan ilegal. Tur desperdicio ta propiedad y responsabilidad di su doño y no cumpli cu ley ta bin cu consecuencianan.

  • Un Aruba Limpi

Un sociedad cu un calidad di bida halto y un economia prospero mester di un medio ambiente saludabel. Nos tur tin un rol pa hunga y cada un di nos tin un responsabilidad, incluyendo bishitantenan riba nos isla. 

  • Educa publico general riba Seperacion di Desperdicio

Ariba un isla manera Aruba, tur locual nos ta importa tin cu bai un caminda despues cu nos a haci uzo di dje. Separacion di desperdicio ta reduci contaminacion ambiental y ta yuda e procesamento responsabel di materialnan. 

 

Un di e actividadnan cu a enfoca ariba ta Baki den Bario. For di 2 di september te 16 di december un parke pa separacion di desperdicio lo ta den rotacion di districto pa districto. Esaki lo ta posibel cu e ayudo di tur partners cu ta colaborando cu e campaña. Di e manera aki lo yuda hogarnan cu e periodo di transicion desde ceramento di Parkietenbos. Mas informacion di fecha y orario lo por encontra riba www.trashtocasharuba.org/pages/limpilimpi of por contacta Bureau City Inspector kende ta encarga pa coordinacion y supervision di e actividad di Baki den Bario.

 

Gobierno di Aruba lo subsidia e procesamento di cierto tipo di desperdicio TEMPORALMENTE como parti di e iniciativa di Baki den Bario. Minister Arends a enfatisa cu “esaki ta ‘TEMPORALMENTE’ pasobra gobierno no ta doño di tur e desperdicio cu ta wordo genera. Nos como ciudadano mester ta consciente cu cada producto cu nos cumpra no ta bin cu su prijs di fin-di-bida inlcui. Basa riba e metanan di Desaroyo Sostenibel pa consumo responsabel, nos tur mester bira cumpradonan mas consciente.”

 

Gobierno di Aruba di su parti ta purba stimula habitonan di separacion di desperdicio a base di tipo. Durante e dianan di Baki di Bario lo acepta green waste, metal, e-waste, desperdicio di construccion reciclabel y bulk waste. Tambe tin cu remarca cu Baki den Bario ta solamente pa uzo residencial y no ta habri pa desperdicio comercial. 

 

Minister Arends a finalisa ta gradici tur partners cu a bini hunto pa logra cu e campaña aki bira posibel. Ta invita comunidad di Aruba pa probecha di e lunana aki pa cuminsa na tene nos Aruba Limpi Limpi. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio