ORANJESTAD, 25 Augustus 2023 – Gremionan representando sector priva, e motor di Aruba su economia, ta preocupa pa e sacrificio financiero cu nos comunidad ta confronta. Aruba Trade & Industry Association, Aruba Hotel & Tourism Association, Comerciantenan Uni, y Camara di Comercio, ta pone hopi atencion na maneho di finansas publico, pa motibo cu ta nos economia ta genera e fondonan cu gobierno ta gasta.
Actualmente, Aruba su Parlamento y Gobierno tin oportunidad pa yega na un acuerdo cu Hulanda cu lo tin dos beneficio:
- Costa nos pais menos den debe.
- Garantisa finansas publico responsabel den añanan benidero.
Pa logra e beneficionan grandi aki pa henter nos populacion, Aruba mester acepta supervision fianciero cu un ley di Reino; RAft. Si Aruba bai di acuerdo cu RAft, Hulanda ta ofrece Aruba fiansa na tasa di interés di 3.1%. Ta un hecho cu Aruba no por presta placa ningún caminda na e tasa di interés asina abao. Según Hulanda e tarifa di interes ta nan costo pa presta den mercado. Si tin duda cu esey ta e costo real, mester ta posibel pa laga expertonan di ambos país verifica esey. Si Aruba nenga di fia di Hulanda y fia den mercado, lo mester paga un interes hopi mas halto: entre 6 y 8%.
Realidad ta cu Aruba a bai di acuerdo cu Hulanda caba pa cumpli cu e normanan den e ley, y cu ta trata di e mesun normanan cu mester cumpli cun’e den un LAft (un ley di Aruba). E unico diferencia entre un LAft y e RAft ta cu Aruba por unilateralmente cambia e acuerdo den un LAft. Esey kiermen cu lo no tin garantia cu den añanan benidero e gobierno actual of gobierno sigiente lo cumpli.
E motibo cu ta importante pa cumpli cu e normanan relaciona cu presupuesto, gasto di personal publico, y debe nacional, ta cu mester reduci e peso cu tin riba lomba di nos comunidad pa sostene nos finansas publico.
KVK, AHATA, ATIA, CUA ta enfatisa: Si Aruba no acepta RAft, Aruba ta perde oportunidad pa ayudo di Hulanda pa refinancia debe na un interes mucho mas abao. Considerando cu ta trata di mesun normanan cu LAft, pero por skapa nos comunidad por lo menos AFL 30 Miyon pa aña, un Parlamento responsabel cu ta priorisa bienestar di e comunidad cu nan t’ey pa sirbi, mester skohe pa RAft.