ORANJESTAD – Dia 1 di juli 2023 Rey Willem-Alexander, a pidi disculpa y pordon pa e historia di sclavitud den Reino. Sclavitud transatlantico ta parti di historia di, entre otro, diferente pais Africano, Europeo, Sur-y Norte Americano y Caribe. Den e contexto aki dia 23 augustus di cada aña ta conmemora Dia Internacional di Memoria pa trafico di e personanan esclavisa y nan abolision. E dia internacional aki tin como meta pa incorpora e tragedia di trafico di e persona esclavisa den e memoria colectivo mundial
Dicon dia 23 augustus? Den e anochi di 22 pa 23 di augustus 1791, na Saint Domingue, awe Republica di Haïti, e rebelion a cuminsa cu lo hunga un papel crucial den e abolision di trafico transatlantico di personan esclavisa. Esaki nan a festeha pa promer biaha den varios pais, specificamente na Haïti (23 augustus 1998) y na e isla di Goree na Senegal (23 augustus 1999).
UNESCO tin un programa/proyecto ‘Ruta di Personanan Esclavisa’. Conforme cu e meta di proyecto intercultural aki mester duna un oportunidad pa refleciona colectivamente y pa analisa e interaccion cu a surgi entre Africa, Europa, America y Caribe. UNESCO Aruba ta contento di mira varios iniciativa di parti di gobierno, comision di conscientisacion, NGO’s y comunidad pa e topico aki. Por lesa mas riba e link aki di UNESCO: https://www.unesco.org/en/days/slave-trade-remembrance
