Ayera, 8 di augustus, alrededor di 1:42 PM durante e trabounan tumando lugar na e Onderstation Sabana Blanco, un contratista encarga cu realoca diferente kabelnan a dal y daña e kabel di transmision di coriente di 60KV cu ta bay Onderstation Paardenbaai, cual ta suministra coriente na e area di Centro di Playa y vecindario. E suceso aki a resulta den un interupcion di servicio di coriente.
E tecniconan na sitio a evalua e situacion y dicidi pa interumpi e servicio di coriente den Centro di Playa pa asina isola e seccion daña di e kabel y evita daño mayor na e instalaccion di 60KV. Alabes pa evita cualkier peliger posibel na e sitio di e incident cu e kabel pa esnan presente.
Danki na e flexibilidad di e grid di coriente na Aruba, despues cu e tecniconan di ELMAR a identifica y isola e problema cu e kabel, a inicia e proceso pa transferi e carga di kabel kibra riba otro kabelnan, cu e meta pa reesteblece e suministro di coriente den e area afecta via rutanan alternativo. Den caso di interupcion di servicio, ELMAR semper ta pone esfuerso pa reestablece e servicio di coriente mas pronto posibel atraves di otro trafohuizen, prome cu atende cu e problema den distribucion di coriente.
Mas o menos 30 minuut despues, ELMAR a inicia e proceso pa reestablece suministro di coriente den e area di Schelpstraat, Bestuurskantoor, Renaissance Wind Creek y vecindario. Asina pues a sigui reestablece e suministro di coriente den e area di Office Systems y vecindario, y un parti di e area di Eagle.
Alrededor 3:19 PM, cu excepcion pa e parti restante di Eagle, coriente a ser reestableci den tur area afecta. Alrededor 4:09 PM, tur cliente tabata tin servicio di coriente bek. Nos tecniconan a traha duro pa reestablece suministro di coriente den tur e areanan afecta.
E sucedido ayera a resulta cu nos mester transferi e carga di un kabel adicional cu a kibra durante e sucedido pa mas kabelnan alternativo. E proceso di transferi carga por medio di otro kabelnan pa reestablece e suministro di coriente ta crea un situacion delicado, door cu e kabelnan alternativo ta cargando un cantidad grandi di coriente caba, cual por causa interupcion adicional di servicio. Esaki ta pone un desafio adicional pa nos ekipo tecnico.
Debi na e situacion esaki pa alrededor 4:09 PM, tur area afecta a haya servicio di coriente bek, e situacion delicado unda e otro kabelnan ta wordo utilisa pa carga e suministro adicional di coriente, ELMAR a encontra un problema adicional den suministro di coriente den e area di Lagoenweg, Beatrixstraat, Wilhelminastraat, Compleho Deportivo Guillermo P. Trinidad y vecindario. Nos tecniconan a mobilisa inmediatamente pa trata cu e situacion aki. Pa alrededor di 5:30 PM, suministro di coriente a ser reestableci den e areanan afecta. Pa alrededor di 6:35 PM bolbe a enfrenta un otro reto den suministro di coriente den e area di LG Smith Boulevard y vecindario. Rapidemente ELMAR su tecniconan a trata cu e situacion aki, y asina pa alrededor di 7:30 PM, tur cliente tabata tin servicio di coriente bek.
Mientras nos tecniconan tabata trahando riba e reestablecimento di servicio di coriente, un otro ekipo tabata dedica pa evalua e kabel kibra di 60KV y busca un solucion pa drecha y pone e kabel di transmision pa Onderstation Paardenbaai bek den servicio. Mesora e ekipo di GIS a diseña un plan cu awe mainta, 9 di augustus, lo wordo ehecuta na Onderstation Sabana Blanco pa repara y realoca e kabel cu a wordo afecta pa asina reestablece operacion normal. E trabounan aki lo tin un duracion di mas o menos 2 siman.
Durante e periodo di interupcion, ELMAR su empleado a traha cu dedicacion pa reestablece e servicio di coriente den e area afecta. Nos Storingsdienst, team di Underground Services, team di IT, team di ingenieronan, team di PR, Operations Manager, Managing Director a traha duro, enfrentando situacionnan delicado, pa sigura cu tur cliente a haña nan servicio di coriente bek den un tempo mas cortico cu ta posibel. ELMAR ta lamenta e sucedido y e inconveniencia cu e situacion aki por a trece, no solamente pa e cuidadano sino tambe pa comercio den e area afecta ayera. Nos kier gradici tur nos clientenan pa nan comprension y nan confiansa den ELMAR.