Parlamento actualmente ta cu reces y lo ta bek na trabao dia 16 di augustus. Sigur ta hopi importante pa informa pueblo di e procesonan y sigur e trabaonan cu a bin ta haci desde apertura di aña Parlamentario 2022-2023 te cu reces di juli. Den e prome partinan mi informa tocante e cantidad di Reunion Publico (‘Openbare Vergadering y Encuentro Publico (‘Openbare Bijeenkomst’) tabatin de cu awor pa e aña Parlamentario 2022-2023 y tambe e proceso di independisacion di Parlamento. Den e ultimo parti aki mi lo informa pueblo tocante e mehoracion di infrastructura y ampliacion di personal na Parlamento di Aruba.
Mehoracion di infrastructura y ampliacion di personal
Despues di aña parlamentario 2023-2024 lo cuminsa e trabaonan na e parti dilanti di Parlamento. Lo cambia e bentanan y pone bentana nobo cu ta mas eficiente pa yuda reduci uso di coriente pero tambe cu ta mas safe. Unabes cu esaki ta cla lo duna e parti dilanti su ‘facelifting’. Banda di esakinan lo bin varios inversion pa modernisacion di funcionamento di Parlamento.
Parlamento tin su masterplan pa renobacion total di e edificio y tin un costo total di alrededor di 7 miyon florin cu lo ser parti den diferente fase. E prome fase ta e edificio den hopi mal estado direccion Fort Zoutman, cu nos a pone den presupuesto 2024 un suma di 3.6 miyon florin pa renoba esaki. Nos ta spera di por haya aprobacion di esaki cu ta di vital importancia pa renob’e mirando su mal estado. Den 2024 tambe lo sigui enfoca pa mehoracion di parti di e sala di Parlamento cu mester wordo cambia paso e no ta den e miho estado. Pa presupuesto 2025 lo pone di dos fase cu ta rond 2 miyon florin cu lo ta destina pa e parti mey mey di Parlamento unda cu entre otro mester pone un lift pa e edificio por ta accesibel, den bista cu na e momentonan aki Parlamento di Aruba no ta cumpli cu e rekisito aki ni pa su propio trahado, ni pa ningun bishitante. E ultimo fase lo mester wordo poni den presupuesto 2026 pa asina Parlamento no solamente por ta independiente pero tambe por ta un hoya di edificio cu ta dun’e su balor di ta un Hoog College van Staat.
Banda di esaki ta necesario pa ampliacion di personal. Na e momentonan aki Parlamento ta conta cu 15 trahado unda cu mester tin un capacidad di 33 trahado. Pa 2023 ainda nos lo ta habriendo 5 funcion, entre nan un hurista, pa asina por yuda kita poco stress di trabao den bista cu ta poniendo hopi presion di trabao. Sigur un entidad manera Parlamento mester por traha den su capacidad total y esaki ta un motibo pakico tin di independisa unda cu actualmente personal ta cay bao di Gobierno y unda e stop di personal ta conta pa Parlamento tambe.
Asina pueblo por wak cu no solamente ta trahando pa mehoracion di funcionamento di Parlamento y trahando pa independisa esaki. Mientras ta trahando riba esakinan ya Parlamento a conoce hopi cambio, entre otro: Parlamento tin su propio huishoudelijke regels, richtlijn pa fractieondersteuners nobo y sigur tambe e cambionan necesario pa regeling fractie ondersteuners pa evita locual a pasa den caso Diamante y sigur a base di rapportnan di CAD a tuma decisionnan interno cu tabata necesario. Sigur pueblo por wak cu tin un masterplan pa mehora infrastructura di Parlamento y unda den un futuro cercano Parlamento tin un edificio moderno, accesibel y independiente.
Pa mas informacion por subi riba Parlamento di Aruba su website na www.parlamento.aw of por bishita nos pagina di Facebook: ‘Parlamento di Aruba’.