Ponton/ Tanki Leendert:
Diabierna den careda di 1’or di merdia, na altura di rontonde Ponton un patruya di polis a topa cu un Toyota tercel coriendo basta iresponsabel. Mesora a bay su tras y a duna e chauffeur un señal pa para. E chauffeur di e Toyota no a respeta e ordo di polis y a sigui core. Aki a cuminsa un persecusion.
E Chauffeur di Toyota Tercel a hisa su velocidad y a bay direcion panort, e patruya a sigui’e, na dado momento e polisnan a trata na para e auto, pero no a logra, e chauffeur a dal contra auto di polis y a sigui core.
E agentenan den e patruya a pidi refuerso di nan coleganan. E persecusion a bin caba pabou di e rotonde di Tanki Leendert, aki ta caminda polis a logra cera e auto y para esaki. Mesora a baha e chauffeur for di e auto, maske e la trata na resisti su detencion, e la wordo poni plat riba vloer y deteni. Transportwagen di polis a transport’e pa warda di polis.
Durante cu nan tabata ristando a bin topa cu un sakito cu un substancia parecido na droga, aparentemente e chauffeur lo tabata bou influencia di e droga haya y pa e motibo aki lo no tabata kier a para.
