BORONCANA: Dialuna den oranan trempan di mainta, alarma a wordo bati na momento cu na costa norte, un testigo lo a mira un of mas hende cargando un jeep cu bultonan parecido na droga. Tipo di accion nan aki ta masha comun ya pa añas.
E testigo mesora a avisa polis y a informa cu e jeep lo a sali bay for e area di Boroncana.
Mesora varios unidad di polis a bay na e sitio, entre otro recherche di e team di departamento di droga. Den lama por a mira un cantidad di pakete ta drief.
Helicopter di polis tambe a wordo manda direcion di Noordkust y enberdad a mira varios pakete den lama. Pa basta rato e helicopter di polis a keda bula riba e rand di costa pa mira si por tin mas pakete mas leu di Boroncana pero aparentmente no a haya mas.
Kustwacht a wordo pidi pa bay den e area di Boroncana na Noordkust pa piki e paketenan cu a keda drief den lama.
No ta conoci cuanto droga a drenta awemarduga pa mainta y ni tampoco cuanto auto lo por a bay caba cu droga, prome cu e testigo atento a mira con nan tabata carga e jeep.
Segun informacion inoficial autoridad lo ta riba un bon pista caba y no lo dura hopi pa nan lo por bay pone man riba e supuesto narcos nan aki.
Cargamentonan grandi manera esaki ta rekeri inversionnan cuantioso di placa, pues aki nos ta papia di Narconan grandi.
Lamentablemente mester bisa si cu ya pa añanan largo bo no ta tende mes mas cu ta gara esnan responsabel pa drenta e kilonan aki pa distribui e isla completo.
E ta mas cu obvio, cu aki no ta trata di e stereo type cu ta bisti slof y tin un tas ta colga na banda y ta core cierto autonan.
