Secretario General di MEP ta ilustra cu e politiconan cu a destrui Aruba financieramente, manera Mike Eman di AVP, diripiente awo kier pretende di tin tur sorto di solucion fantasma. Mike Eman ta e ex-minister presidente cu a grita den Parlamento di Aruba cu e ta orguyoso di e debe cu el a crea (mega debe) y cu e debe t’ey pa nos tur bay pag’e den futuro. “Qué barbaridad!”. Alabes, Mike Eman ta esun cu a bay den welga di hamber, bay bati weya y a yama e Hulandesnan “verkrachters”, en bes di a subi avion bay Hulanda negosha y yega na un acuerdo cu Hulanda riba su barbaridad financiero. Tambe, ta Mike Eman a yega di falsifica y fabrica su propio tabel y a plak esaki na un Outlook di Banco Central pa manipula pueblo. MEP e tempo aya y colega Rocco Tjon den parlamento a descifra e practica di Mike Eman. A manda puntra Banco Central si e tabel cu Mike a show cu ne den conferencia di prensa y publica hunto cu e Outlook di Banco Central di berdad ta un tabel di Banco Central. Categoricamente, Banco Central a contesta cu e tabel ey NO ta di nan. Pues, aki a bolbe gara Mike Eman ta gaña y ta manipula un bes mas. Prohibi pa lubida!
Banco Central cu un Outlook super positivo:
Dia 27 di juli 2023, Banco Central di Aruba a publica su “Economic Outlook”, cual ta contene un actualisacion di aña 2023 y alabes un proyeccion inicial pa aña 2024. Banco Central a splica cu e crecemento di e actividadnan den turismo tabata fuerte den aña 2022 y a sigui aumenta den e prome kwartaal di 2023. Por tuma nota cu diferente indicador relata na e sector turistico a “SURPASA” aña anterior, esta 2022. Di acuerdo cu Banco Central e indicadornan, manera cantidad di bishitante procedente di exterior (+31.1%), promedio di tarifa diario (+14.7%), entrada pa camber disponibel (+54.2%) a surpasa “by far” aña 2022. Esaki den combinacion cu e subida den prijs general di producto y servicio a yuda aumenta e cantidad di placa cu e turistanan a gasta den comparacion cu e prome kwartaal di 2022. Tin mas indicador manera inversion y empleo a demostra mehoracion. Banco Central ta termina bisando cu e desaroyonan magistral den e prome kwartaal di 2023 ta duna un bista hopi positivo di nos economia den fase di recuperacion.
Turismo ta keda e motor:
Pa aña 2023 turismo ta keda e “motor” y e contribuyente principal na e crecemento den e producto domestico bruto, esta PDB y cu expectativa cu candidad di e bishitantenan lo surpasa aña 2019 y lo yega 105% den comparacion cu e miho aña cu Aruba a yega di tin (2019). Alabes, Banco Central ta menciona den su Economic Outlook cu importacion lo conoce crecemento substancial. Pa aña 2024, Banco Central ta proyecta cu e cantidad di e bishitantenan di exterior lo alcansa 107% den comparacion cu aña 2019. Ta premira un surplus riba balansa di pago (BdP) pa motibo di mas entrada relaciona cu turismo, cual ta surpasa pago di importacion. Mas BON noticia! Resumiendo, esaki ta bin di e trabounan duro cu Gabinete Wever Croes II ta haci den ekipo den fuerte colaboracion cu tur su profesionalnan den field. Pues, no laga e opositornan cu noticia fabrica falso y tendencioso negativo tur dialuna mainta purba bruha nos comunidad y cambia e curso cu e pais aki ta bayendo den fase di recuperacion. Locual ta publica akiriba ta fresco y recientemente di Banco Central y por mira esaki tambe riba nan website. Hunto nos lo logra pone Aruba riba e “rails” corecto bek. Los perros ladran, la caravana pasa!