Avenida Nelson O.Oduber – Diasabra anochi pa mas o menos 9’or pasa polis y ambulance a bay cu urgencia ariba Avenida Nelson O.Oduber cu ta bay direccion nort.
Pariba di caminda di ex House of Cheng un auto a bolter y a bay cay den mondi. Esaki a sosode despues cu e la ranca un palo di luz completamente.
Dos ambulance a presenta, mirando cu tawata tin mas cu 1 persona herida. Esun di mas serio Paramediconan cu ayudo di polis mester a bay den mondi unda e auto BYD a bay cay pa sak’e.
Segun testigo; ” Mi a wak e auto mi dilanti bayendo cu velocidad halto ranca e palo di luz y bay halto cay den mondi”.
Tres persona a resulta herida, di cual uno ta esun cu a haya mas golpi.
E di 4 a wordo deteni door di polis, no ta conoci pa nos pakiko. Un mayor di e hobennan envolvi tambe a yega na e sitio pa e pone su mes na altura di kiko tawata pasando.
Polis di trafico, departamento tecnico di polis y Elmar tambe a yega na e sitio. Varios palo di luz a keda sin coriente.
