Oranjestad, Aruba – 3 juli 2023 2023 – ELMAR ta lamenta e sucedido di diabierna 30 di juni, unda cu un poste di coriente a cay riba caminda den e area di Pos Abou. E suceso a tuma lugar den oranan di merdia, pa ta exacto 12:13 PM, causando e interupcion temporal di suministro di coriente den e area di Pos Abou y vecindario.
Tecniconan dedica di ELMAR a reacciona lihe na e situacion aki y pa 12:20 PM a cuminsa eherce trabou di reparacion pa reestablece suministro coriente. Mesora cu esaki a sosode a cuminsa cu un investigacion. A bin resulta cu e palo di luz aki sufri daño door di un accident di auto den pasado. Ta conoci cu sa pasa accidentenan di auto cu ta dal riba e poste di ELMAR sin cu ta avisa ELMAR, pa nos por eherce trabou di reparacion necesario na e momento ey.
Apesar di e desafionan cu a presenta pa e suceso, ELMAR a cuminsa reestablece e suministro di coriente pa 1:13 PM y a logra reestablece e suministro di coriente den mayoria di area afecta pa 1:20 PM.
Nos tecnico a traha duro pa reesteblece e coriente na tur casnan y negoshinan afecta. Pa 5:50 PM a finalisa e proceso di reestablecemento y tur cliente tabata tin coriente bek. Nos ta compronde e molester cu e interupcion di servico aki por a ocasiona, y nos ta pidi disculpa sinceramente pa e incomodidad experiencia pa nos clientenan durante e periodo aki.
Siguridad di nos clientenan y tecniconan ta keda nos prioridad principal. Nos ta desea di sigura nos comunidad cu tur esfuerso a worda haci pa agilisa e proceso di reestablecemento y minimalisa cualkier incomodidad adicional.
