ORANJESTAD, ARUBA – Fundacion Parke Nacional Aruba (FPNA) awe ta anuncia cu Tyson Lopez a ser apunta como e Director General nobo, cu como parti di e Hunta di Directiva di FPNA lo guia e implementacion di FPNA su Multi Annual Corporate Strategy 2023 – 2032 (MACS) pa asina transforma FPNA di un organisacion tradicional di maneho di parke pa un organisacion di conservacion moderno.
Fundacion Parke Nacional Aruba ta un organisacion di maneho di conservacion independiente encarga cu e conservacion di naturalesa, y e maneho di areanan protehi na Aruba cu awe ta cubri un poco mas cu 24% di Aruba su area terrestre y 0.02% di Aruba su awanan teritorial. Recientemente, FPNA a lansa su MACS 2023 – 2032 cu ta un strategia cu ta responde na e retonan ecologico, social y economico, y tambe e ta representa FPNA su compromiso pa cumpli cu trabounan di conservacion cu mas enfasis riba sostenibilidad, biodiversidad, mehora e sistema ecologico y mas iniciativa di restauracion, mientras ta desaroya un base di sosten social y economico door di creacion di balor.
Tyson ta naci na Aruba y ta un persona cu ta pasiona y comprometi na conservacion di naturalesa pa Aruba y sostenibilidad. Cu un Bachelor’s Degree den Organization, Governance and Management di Universidad di Aruba y un Master’s Degree den International Development Studies di Universidad di Utrecht na Hulanda, Tyson ta trece cune mas di 10 aña di experiencia trahando na lugarnan manera Aruba Excellence
Foundation, Office of the EU & Kingdom Relations, y Gobierno di Aruba – unda cu ela specialisa den areanan manera maneho publico, maneho di relacion publico y priva, sostenibilidad, gobernacion, diplomacia publico, maneho stategico, maneho di programa y proceso di consulta participativo.
Prome cu Tyson a wordo apunta como Director General, Tyson a fungi como Sustainable Recreation Manager di FPNA di mei 2019 te cu juni 2023 mientras cu tambe ela keda encarga cu e departamento di benta. Bou di su liderazgo, Tyson a crea y ehecuta un plan strategico di maneho di bishitante pa asina reduci e impacto di bishitantenan riba naturalesa den areanan protehi bou maneho di FPNA. Tambe ela guia e proceso di FPNA su restructuracion y a crea un guia sostenibel financiero. Adicionalmente, Tyson a hunga un rol clave den e creacion strategico di FPNA su MACS 2023 – 2032. Tyson su apuntacion como CEO a wordo ricidi positivamente pa e team di maneho y rangers di conservacion di FPNA.
Tyson Lopez, Director General, FPNA ta comenta: “Pami ta un honor pa tuma e rol di Director General di FPNA. Conservacion di naturalesa na e momentonan aki ta crucial y nos na FPNA ta comprometi na duna mas balor y fortifica nos trabounan di maneho di conservacion y tambe haci mas pa inspira nos comunidad y bishitantenan pa conecta cu e bunitesa y balornan natural di nos naturalesa, historia, y herencia natural cu Aruba tin di ofrece, mientras cu nos ta proteha naturalesa tambe.”
“Despues di un proceso di selection intensivo, e Hunta di Supervision di FPNA ta orguyoso di por a apunta Sr. Tyson Lopez como e Director General nobo di FPNA”, Norman Kuiperi, Presidente, Hunta di Supervicion, FPNA ta comenta. “Nos tin tur confiansa den Tyson su habilidad como un lider dinamico y pasiona cu ta cla pa ranca sali y strategicamente guia e
organisacion como un organisacion moderno di conservacion cu ta comprometi na e protecion, preservacion y restauracion di naturalesa di Aruba. Den nomber di e Hunta di Supervision di FPNA nos kier a tuma e oportunidad aki tambe pa gradici Sra. Natasha Silva, Director di Conservacion di FPNA pa su compromiso, dedicacion completo y flexibilidad den carga e organisacion mientras cu nos tawata en busca di e cantidado adecua pa hunto cu Natasha guia FPNA como e Hunta di Directiva.”
Fuera di ta e Director General di FPNA, Tyson tambe ta un docente part-time na Universidad di Aruba unda cu e ta duna les den coordinacion di proyecto y tambe ta guia y conseha studiantenan riba nan progreso academico. Den su tempo liber, Tyson ta gusta explora naturalesa door di hike, y e ta tene su mes inspira y motiva door di lesa bukinan cu ta provoca su pensamentonan y scucha podcastnan educacional. Fuera di esey, Tyson ta aprecia conversacionan significante cu diferente personanan mientras e ta disfruta di un copi koffie fuerte di cual semper e kier descubri e storia patras di unda e boonchi di koffie a origina.
Klik aki pa lesa FPNA su Multi Annual Corporate Strategy 2023 – 2032. ***