Diasabra mainta, 1 di juli 2023, Gobierno di Aruba lo tin un ceremonia conmemorativo di 160 aña di abolicion di sclavitud den Reino Hulandes. Un ceremonia cu ta bay tuma lugar den henter Reino Hulandes y tambe na Suriname unda cu nan ta celebra Keti Koti (dia di emancipacion). E ceremonia cu sigur su base no ta solamente sinta na e cantidad di aña di abolicion, pero mas bien ta un agenda specifico di Hulanda.
Fraccion di MEP ta subraya cu mas conocemento encuanto nos historia di sclavitud y su impacto riba nos isla y nos hendenan ta algo cu nos mester duna su debido atencion. Pasobra te dia di awe nos ta sinti y experiencia su impacto. Tin ta reconoce y ta compronde y tin cu no sa di su impacto mes. Pesey mes ta bon cu nos ta pone como un prioridad di formacion di nos comunidad. Asina nos ta compronde mihor di unda nos ta bin, unda nos ta awe y nos por stipula mihor unda nos kier bay.
Cu Hulanda e aña aki ta scoge pa pone mas atencion riba e tema y reconoce cu sclavitud tabata un crimen contra humanidad cu te awe ta afecta nos relacion pa cu otro den Reino, berdad ta un stap den e bon direccion. Cu Hulanda a indica cu e disculpa duna door di nan Minister Presidente Rutte no ta un punto pero a pone un komma tambe nos ta aplaudi. Pero loke Fraccion di MEP no ta haya bon ta e resistencia pa abiertamente papia di cierto topiconan manera reparacion y cu ta purba yena e espacio despues di e komma sin envolve e islanan. Esaki nos a vocifera tambe na reunion di IPKO.
Mientras den Reino nos ta papiando di e tema di sclavitud y colonialismo y nan impacto te cu awe riba nos hendenan, mientras nos ta discutiendo encuanto e posibel maneranan pa haci e deficit democratico den Reino menos, Fraccion di MEP ta haya incomprendibel e manera con Hulanda ta trata Aruba den e caso di supervision financiero (RAFT). Apesar di no tin consenso real, cu organonan independiente manera Raad van Advies, Raad van State y hasta profesornan Hulandes cu ta mustra cu esaki ta robes y sabiendo cu Parlamento di Aruba no ta di acuerdo, Hulanda ta persisti pa esaki keda riba mesa y forsa pa e bira un realidad.
Un forma moderno pa mina nos autoridad y responsabilidad propio, cu nos ta considera como practica di esclavitud moderno. E por ta zona brutal, pero e ta ilustra si e realidad cu islanan Aruba, Curaçao y Sint-Maarten ta experienciando for di e gabinete Hulandes Rutte III. Pa es motibo aki Fraccion di MEP a dicidi pa no asisti na e acto conmemorativo. Pasobra cu si bo ta pidi sorry, conmemora o celebra algo asina relevante cu tur den Reino e tin di wordo demostra tambe den e forma cu bo ta atende cu nos den Reino.