Henter Aruba lo mester a keda asombra cu e contesta cu Presidente di Parlamento a duna e lider di oposicion, mr. Mike Eman, na momento cu esaki a lanta para, dirigi su mes na e Presidente y puntra ‘ki dia ta scucha e gemionan sindical y OPPA tambe manera cu fraccion di AVP a solicita’.
Tabata na final di e encuentro cu gremionan comercial cu e Lider di Oposicion, mr. Mike Eman, a insisti riba un encuentro cu gremionan sindical y OPPA pa scucha di nan banda tambe kico ta nan opinion riba e 7% BBO na frontera. Riba esaki e Presidente di Parlamento, mr. Edgar Vrolijk, a laga Eman sa cu “na anja 2025 lo e yama e reunion ey”.
Despues di hopi insistencia porfin a a yega na scucha gremionan comercial cu tabata hopi cla y unanime den nan opinion: e ley di BBO di 7% riba tur locual tin awor caba na peso riba pueblo y comercio lo trece Aruba na e “BREAKING POINT”.
Inicialmente no tabata conoci kico berdaderamente e impacto di e 7% BBO na frontera lo bai ta. Den e confusion aki gobierno a keda pusha e ley aki como un cambio cu menor concecuencia pasaobra supuestamente esnan cu paga e 7% lo haye bek. Awor tin un realisacion mas grandi cu e presentacion aki ta uno eroneo y cu e concecuencia ta bai ta devastador pa e consumidor, e empresario, turismo di Aruba, su prijs y su calidad y finalmente pa henter e desaroyo socio economico di Aruba. Pesey fraccion di AVP a haye urgente pa scucha e gremionan y pa e motibo ey a haci un solicitud pa trece gremionan den Parlamento den un “hearing” publico pa pueblo tambe por scucha, asina e lider di oposicion, mr. Mike Eman a accentua despues cu ya e tin lunas ta adverti pa concecuencianan di e 7% BBO na frontera.
E conseho di RAAD VAN ADVIES ariba e introduccion di 7% BBO na frontera tambe ta cla y directo: efectonan lo ta devastador pa poder di compra, inflacion, clima di inversion, turismo y nos economia en general. Raad van Advies ta hasta cita Banco Central cu ta pronostica un caida real den nos economia pa anja 2023. E cifranan aki e lider di oposicion a mustra gremionan riba dje cu nan a subraya cu emberdad esakinan ta indicacion cu nos ta na e “BREAKING POINT”.
Fraccion di AVP a solicita cu urgencia un Openbare Bijeenkomst cu FTA, SEPPA, STT, ABV, SIWA, OPPA, SADA, CAMARA DI COMERCIO, Comerciantenan Unie, SNBA, ATTIA, AHATA, ATA, RESTAURANT ASSOCIATION, TIMESHARE ASSOCIATION, Aruba’s Jewelers Association y demas gremionan sindical, comercial, prome cu entrega pregunta.
Pa e lider di oposicion mr. Mike Eman ta incomprendibel cu despues di scucha gremionan comercial mes bisa cu e medida di 7% lo ta devastador pa e consumidor, esta gran parti di e pueblo trahador y nos pensionadonan, cu e Presidente di Parlamento, mr. Edgar Vrolijk, ta tuma e postura y laga Eman sa cu ta te na 2025 lo scucha sindicationan y OPPA.
Den e dianan aki lo mira si Presidente di Parlmento lo keda riba e postura aki. E lider di oposicion, mr. Mike Eman, a accentua cu lo insisti pa scucha e gremionan sindical y OPPA, manera cu Fraccion di AVP solicita, pero cu di nan parti tambe mester laga e Presidente sa cu e ponencia “cu ta na 2025” lo scucha nan NO ta acceptabel.