Recientemente Fundacion Parlamento Hubenil a celebra su di 20 aña di existencia. Esaki ta un logro grandi pa e fundacion aki cu tin como meta pa traha na e formacion y desaroyo di nos hobennan.
Instalacion
Riba 12 di mei ultimo Parlamento di Aruba tabata tin e honor di por a fungi como e sala di ceremonia caminda 21 hoben a keda instala como miembronan di Parlamento Hubenil. Tabata impresionante pa wak e hobennan den sala di Parlamento, pasobra esaki ta e cas di pueblo y tambe e modelo di cual e Fundacion Parlamento Hubenil ta forma nos hobennan cu balornan di respet, ‘advocacy’, y democracia. Bunita pa a wak con e hobennan a lesa nan credo di Parlamento Hubenil, a priminti di haci nan esfuerso a base di tur nan habilidadnan y na final a ricibi un pin como simbolo oficial di ta miembro di e prestigioso organisacion aki.
Lanta Parlamento Hubenil
Na aña 2002-2003, mi persona tabata tin e honor y oportunidad pa a haci mi stage na Ministerio di Asunto Social. E tempo ey den mi di 3 aña di estudio di ‘culturele en maatschappelijke vorming’ (CMV), bou di gobernacion di MEP mi a yuda na forma e cuadro y contenido di e proyecto e tempo ey cu yama ‘Parlamento Hubenil’. E concepto di parlamento hunbenil tabata tey caba den diferente pais p.e., Hulanda, Corsou y otro paisnan latinoamericano. Asina mi tabata busca y lesa tocante di nan y hasta mi a bishita e parlamento hunbenil di Corsou e tempo ey. Tabata cu hopi entusiasmo cu nos a traha pa duna e concepto un forma den nos contexto arubiano, crea un logo, bishita e scolnan y promove e proyecto den comunidad.
Dos decada di formacion hunenil
Awe mi ta orguyoso y contento di por wak cu e ‘proyecto’ Parlamento Hubenil a crece y bira un entidad valioso riba su mes. Dos decada den cual e idea a bira un proyecto y e proyecto a bira un fundacion. Dos decada den cual hobennan ta haya e oportunidad pa forma y desaroya nan mes riba diferente tereno. Esun mas principal, ta pa nan tin confiansa den nan mes y cu nan por vocifera nan bos. E bos Hubenil cu semper mester resona y trece perspectivanan innovativo dilanti. E bos di e generacion nobo cu ta recorda esnan mas grandi cu nan tambe tey y cu mester tene cuenta cu nan futuro. Un pabien na directiva, staff y e hobennan cu e increibel aniversario aki.
