ORANJESTAD – Siman pasa, Minister di Husticia y Asuntonan Social sr. Rocco Tjon, a tene un reunion sumamente positivo hunto cu DRH y KPA, caminda a delibera e direccion di Cuerpo Policial, pa loke ta trata nan reorganisacion. E meta ta, pa logra finalisa esaki pa fin di aña, y loke lo tene cuenta cune sigur ta e echo cu e funcionnan mester ta mas flexibel pa asina por duna e Agentenan Policial mas espacio pa sigui crece, pues amplia nan carera. Den e reorganisacion aki tambe ta tene cuenta cu e diferente proyecto y procesonan cu ta den pleno ehecucion, manera Family Justice Center y Operation Command Center na Savaneta.
Manera ta conoci algun tempo atras a emiti e “position paper” caminda Alto Comisario a splica e enfoke cu ta bay tin pa loke ta Cuerpo Policial, y esaki ta cuadra cu e punto di salida pa loke ta e “beleidsvoornemens” di Ministerio di Husticia y Asuntonan Social. Diferente inversionnan ta tumando luga den Cuerpo Policial, principalmente den e parti di material, pero tambe den aspectonan infrastrucutural, pa crea e condicionnan di trabou adecuado pa e Agentenan Policial. Mas importante cu esaki ta pa percura cu e structura di e organisacion por coincidi cu e demanda cu tin riba Cuerpo Policial, pa loke ta combati criminalidad.
Banda di esaki, lo duna atencion tambe na procesonan pa fortifica “bedrijfsvoering” y “personeelszorg” cual ta sumamente importante pa e proceso primario di e organisacion. Polis di bario lo wordo miho ekipa, pero tambe un departamento di informacion y inteligencia mas amplio cu mas posibilidad. Mirando e diferente desaroyonan den cuadro di siguridad na nos frontera tambe ta tene cuenta cu palabracionnan cu tin haci pa por brinda Arumillers, cu ta personal bon ekipa, un espacio den e organisacion di KPA.
Por ultimo, e mandatario a indica cu e meta di e reorganisacion ta pa haci Cuerpo Policial un organisacion mas agil pa por combati diferente fenomenonan di criminalidad, y na mes momento brinda mas perspectiva na nos Agentenan Policial. Dentro di poco DRH conhuntamente cu un ekipo di KPA lo bay Hulanda pa haci un bishita di trabou pa wak principalmente e parti di e carera di e Agente Policial na Hulanda y wak con por aplica e sistematica aki na Aruba tambe.