ORANJESTAD – Dialuna mainta siman a habri caminda Minister di Turismo y Salud Publico sr. Dangui Oduber a duna un conferencia di prensa na Eagle Beach. Aki e mandatario a anuncia cu Tourism Product Enhancement Fund (TPEF) a haci compras di 100 bari di sushi cu lo bay wordo aloca na nos costa.
E proyecto aki ta wordo haci den bon colaboracion cu departamento di DOW y Serlimar. Minister Oduber a menciona cu TPEF ta paga pa e barinan aki cu e fondo cu e tin presupuesta pa medio ambiente. DOW ta keda encarga pa supervisa e trabounan cu e ploegnan ta haci. Tambe nan lo coordina cu Serlimar unda e barinan ta bay keda aloca na nos costa. Serlimar ta keda encarga pa zorg pa e barinan di sushi.
E 100 bari nan aki lo bay wordo aloca den e 10 areanan caminda e ploegnan di TPEF ta opera. E areanan aki lo ta entre Arashi Beach y Baby Beach na nos costa. TPEF tin un total di 10 ploeg cu ta mantene nos costa y beachnan limpi. E barinan aki lo ta facil pa indentifica como cu riba nan ta bay tin e logo di TPEF.
TPEF a keda funda na aña 2010, e ta un fondo cu a wordo traha cu e proposito pa inverti den proyectonan cu ta contribui na e mehoracion di e producto turistico di Aruba.
Minister Oduber a splica cu e obhetivo ta pa Aruba su costanan keda limpi pa asina nos por brinda un miho producto na nos bishitantenan. Un medio ambiente limpi caminda nos localnan por disfruta di nos beachnan hunto cu nan famia.
Minister Oduber menciona cu TPEF a financia varios proyectonan cu ta na caminda den e simannan nos dilanti. Tin e proyecto di hooiberg fase 3 caminda ta bay pone mosaic na e trapinan. Tin e proyecto di boardwalk Malmok fase 3 caminda ta bay drecha e landscaping na e fishermans hut. Despues lo sigui cu fase 4 caminda ta bay conecta e boardwalk te na Ritz Carlton y te na Radisson Blue. Tin e proyecto di renobacion di nos Museo Arqueologico Nacional Aruba. Un otro proyecto grandi na caminda ta e proyecto di embeyecimento di henter e strip di Eagle Beach. Por ultimo tin e proyecto di embeyecimento di Rodgers Beach cu tambe ta bay wordo financia pa TPEF.
Finalmente Minister Dangui Oduber a gradici e hunta di TPEF lidera pa e president sra. Sjeidy Feliciano. Tambe un danki na DOW y Serlimar pa nan bon colaboracion den e proyecto aki. Un proyecto necesario cu lo bay percura pa mantene nos playanan limpi.
Minister Oduber ta haci apelacion na communidad pa ban mantene nos beachnan limpi y haci bon uso di e barinan di sushi.
