ORANJESTAD – Awe mainta Corte Superior a trata e apelacion di e Chaman Peruano C.J.I., kende dia 3 Juni 2022 a wordo condena na 4 aña di prison pa a viola e damanan, B. y E. y a mishi cu e dama C.
ACUSADO A APELA
Tres Hues cu ta forma Hof a puntra C.J.I., kico ta e motibo cu el a apela. C.J.I. a bisa cu el a apela pasobra tin hopi gañamento. Segun C.J.I. el a haci practica den hopi grupo y no ta compronde e denuncia di e dama C. Hof a remarca cu pone piedra riba parti intimo y supla mey mey di pecho di C. ta considera mishi. Hof a mustra cu segun C., C.J.I. lo a pone su man na su parti intimo. C.J.I. a bisa Hof cu el a pone piedra na tur e chakra di e curpa como terapia. El a bisa cu e ta haci curandero di Peru. El a bisa cu el a wordo invita door di hende cu a bay Peru na 2016. Desde e tempo ey, tur aña e tabata bin Aruba.
TENE RELACION SEXUAL
Hof kier sa di terapia di chakra. C.J.I a splica henter e procedura caminda ta pone piedranan riba chakranan, usa oracion, sonido di bel. C.J.I. a bisa cu e ta bisa e persona pa bay den un estado di meditacion pa conecta. Esey ta pa e persona ta mas trankil posibel pa asina por libera cualkier tipo di blokeo cu tin.
Hof a mustra cu e tres damanan a bisa cu C.J.I. a puntra nan hopi cos riba tereno sexual. Segun C.J.I. tin bruhamento pasobra tur e chakranan ta relaciona cu otro. El a bisa cu el a haci nan hopi preguntanan di nan bida y esey nan no ta bisa. Hof a bisa cu e damanan ta sinti cu C.J.I. tabata busca un acercamento sexual. Segun C.J.I. nan ta exagera. El a bisa Hof cu den e proceso di kita blokeo, ta reprograma e persona. Hof a puntra si den esey lo tin relacion sexual pasobra C.J.I. tabatin relacion sexual cu B. y E. Segun C.J.I. e relacion sexual no a sosode durante un session sino despues di e session. Hof a mustra cu e dos damanan a declara cu ta despues di e session, C.J.I. a bay na nan cas y na cas C.J.I. a sigui cu e session. Segun C.J.I. e session a caba y ta e damanan B. y E. mes tabatin relacion sexual cun’e.
Hof tabata haci C.J.I. hopi pregunta riba e tenemento di relacion sexual cu cliente y e tabata desmenti cu esey tabata forma parti di e session. Hof a remarca cu e declaracion di e victimanan y di C.J.I. ta diferencia masha hopi. Segun C.J.I. e dos damanan a coordina con pa declara contra dje. C.J.I. a bisa Hof cu no ta e so ta responsabel, sino e damanan tambe. E no ta haya cu loke el a haci ta algo malo. C.J.I. a bisa cu el a tuma e decision cu e no ta bay sigui comparti su conocemento cu otro mas. E lo bay keda practica esaki na su pais so.
E dama B. haci demanda di 50 mil florin. Solamente 5 mil, Hues a aproba. E dama B. ta haya cu C.J.I. a causa un trauma riba esun cu e tin caba. E dama E. a demanda 650 florin y a keda aproba.
PG TA EXIGI 5 AÑA
Procurador General (PG) a bisa Hof cu C.J.I. a wordo condena na 4 aña di prison caminda e ta wordo haya culpable di a viola dos dama y mishi cu un otro. C.J.I. no a nenga di tin relacion sexual pero cu el a haci esaki cu permiso di e damanan. E damanan ta bisa cu ningun momento a duna permiso. PG a pidi Hof pa confirma e sentencia di Corte pero pa aumenta e castigo na 5 aña di prison. PG ta haya cu C.J.I. durante session a hinca e damanan den un situacion cu nan no tabata por a haci nada. PG a pidi pa mantene e demanda di daño di C. y E. Pa B. el a pidi pa recompensa 7 mil.
ABOGADO
Mr. Illes a bisa Hof cu C.J.I. ta para riba cu e no a haci nada malo. Un Chaman ta un un curandero cu ta haci tradiccionnan Peruano pa yuda hende. E ta specialisa den curamento di chakra. E ta traha riba e 7 chakranan pa cura hende. Na opinion di e abogado, tur tres dama a aserca C.J.I. pa session. Dos di e damanan a tene relacion sexual cu C.J.I. E acusado ta desmenti di a viola e damanan. Ningun momento el a forza nan pa tin relacion sexual. E abogado a bisa cu e dama B. ta papia di cu C.J.I. a hink’e den un trans y no por a haci nada, pero no tin ningun indicacion cu ta asina. Esey no ta posibel. El a bisa cu ta e dama mes tabata kier tin relacion sexual y na dado momento a stop C.J.I. di haci cierto relacion. E abogado a bisa Hof cu e ta haya cu Hues no a tene cuenta cu esaki. E ta haya cu mester tin duda den declaracion di B. pasobra e no ta bisa cu C.J.I. tabata puntr’e si realmente e tabata kier tin relacion sexual. E abogado a bisa Hof cu B. tabata sa for di 2 aña pasa con e session ta. Awor e ta bisa cu e no sa kico pa spera di e session. E abogado a cuestiona e hecho cu E. a haci denuncia 2 aña despues di e session. E tambe tabata sa con e session ta sosode. El a dicidi di haci session y tambe tabata kier tin relacion sexual. E abogado ta haya cu mester declara C.J.I. liber pasobra e ta haya cu B. y E. a dicidi di duna e mesun denuncia y descripcion. E abogadoa bisa cu cada session ta diferente. E dama C. ta bisa cu C.J.I. lo a mishi na su parti intimo. E abogado a mustra cu C.J.I. a splica con e session ta sosode y cu ta pone piedra y cu ta usa bel y supla pa reprograma. C.J.I. tabata mishi cu e piedra pero no a mishi na e parti intimo. E abogado a conclui cu mester declara C.J.I. liber.
Awor Hof ta bay studia e caso y dia 10 Juli 2023 lo tin sentencia.