Dentro di Tratado di Derecho di Mucha, particularmente articulo 22, ta referi na e mucha refugiado. Departamento di Mucha y Hoben (DMH) tambe kier aporta na conscientisacion di e fecha di 20 di juni, organisa pa Nacionnan Uni, unda mundialmente e instancianan cu ta traha cu Tratado di Derecho di Mucha y mucha den general, ta pone atencion na e poblacion di refugiado. E dia aki ta diseña pa celebra y honra e refugiadonan rond di mundo, di cual Aruba sigur no ta un excepcion!
Dia Mundial di Refugiado
Dia 20 di juni 2001, a establece e dia pa prome biaha, como reconocemento di 50 aniversario di e Tratado Relaciona cu e Status di Refugiado di 1951.
E dia aki ta pa construi e concepto di comprension di e dificil situacion, cu ta mustra e resiliencia y curashi di uno den reconstruccion di su futuro. E dia aki ta pa duna bista riba un oportunidad pa tur cu ta experiencia, compronde y celebra e diversidad rico di e comunidadnan di refugiado.
Kico kiermen refugiado?
Un refugiado ta un persona cu ta buscando un ‘safe haven’ despues di a wordo forsa pa huy di violencia, persecusion of guera. Busca asilo no ta un crimen! Pero no tur hende cu ta busca asilo, lo haya reconocemento como un refugiado.
Tres tipo di Refugiado
En general ta categorisa tres tipo di refugiado: buscado di asilo, migrante y persona desplaza internamente. Segun UNHCR tin alrededor di 65 miyon di hende rond di mundo, cu a wordo forsa pa bandona nan hogar y entre nan casi 27.1 miyon refugiado, di cual 41% ta bou di 18 aña. Na 2021, 68% di tur refugiado ta origina for di solamente 5 pais: Siria, Venezuela, Afghanistan, Sur Sudan y Myanmar.
Situacion Aruba
Mientras cu na Aruba no ta facil pa haya e datonan specifico relaciona cu henter e asunto di refugiado, no ta descarta cu casi tur siman por lesa den media, con ta haya e situacion preocupante di boto di Venezuela tratando di drenta Aruba na un forma sumamente peligroso. Tambe nos ta bon na altura cu e muchanan vunerabel aki, ta bishita nos scolnan y sigur tin derecho tambe pa haya tur tipo di asistencia dentro di nos comunidad local.
Segun dato di HIAS, for di 2014, Aruba a bira un destinacion pa e refugiadonan y e migrantenan di Venezuela. Cu un populacion di djis riba 110 mil habitante, Aruba ta anfitrion pa alrededor di 17 mil Venezolano. Segun HIAS na 2019 Aruba a ricibi mas di 2 mil peticion pa asilo, di cual mayoria no a haya aprobacion, cual ta haci e situacion uno sumamente vunerabel, mirando cu nan no tin acceso na salud en general. Y sin laga afor, cu pa un mucha indocumenta tin acceso na scol di 4 te 16 aña, ta rekeri p’e mucha tin un seguro priva, mientras e periodo di 0-4 aña ta keda uno sumamente vunerabel den desaroyo optimal y sano di un mucha.
Finalmente como mayor, educador y/of cuidador principal di nos muchanan, DMH ta haci apelacion na tur, pa sikiera cuminsa combersa tocante e topico di refugiado, na un manera responsabel y husto, sin prehuicio. Pregunta basico manera; Kico bo sa tocante refugiado? Dicon bo ta pensa cu tin tanto hende y mucha ta bandona nan hogar? Bo ta kere cu e muchanan ta feliz door di huy di nan hogar? Bo lo por keda sorprendi di e contestanan y kico tur nan como mucha sa y ta pensa di e topico aki.