ORANJESTAD – Diaranson mainta, Prome Minister Evelyn Wever-Croes a bishita Educampus, cu ta un otro scol cu a gana e proyecto di Edutech. Educampus compara cu otro scolnan na Aruba, tin un otro sistema di duna les pa prepara e muchanan den enseñansa. Nan ta traha cu un sistema hopi innovativo basa riba e sitsema mericano cu cierto “aansluiting” na e sistema hulandes. Tin hopi interes di parti di alumnonan pa drenta e scol aki, pero debi na capacidad limita, tin un lista di espera basta largo.
Educampus a inscribi na e proyecto di Edutech pa asina logra yega na un “makerspace”, cu ta un container cu nan lo cambia y na unda nan lo trece tur e “tools” nan digital cu mester. Esaki sigur ta di gran beneficio pa e muchanan, mirando cu e lo stimula nan pa pensa na un forma innovativo. Mirando e avansenan den e mundo digital, nos no sa kico lo ta e trabounan cu lo tin mayan pa e futuro generacion. P’esey ta importante pa bin cu proyectonan asina, cu lo duna nos muchanan e habilidadnan necesario pa nan por ta exitoso mayan.
Prome Minister ta felicita Educampus cu e proyecto importante y bunita aki, y a gradici nan pa e confiansa den e proyecto di EduTech. Pa haci e proyecto di innovacion aki posibel, Gobierno a aloca un suma di 400 mil florin, cu lo wordo dividi den 4 tranche. Pa e prome dos tranchenan, un total di 15 scol a inscribi di cual 6 a wordo eligi. Pa e scolnan aki un total di 200 mil florin a wordo aloca. Pa e di tres tranche, a inscribi 10 scol y e huradonan ta den proceso pa wak cua ta e scolnan ganador pa e 100 mil florin aki. Pa e di e cuater y ultimo tranche pa e aña aki, inscripcion ta cera e luna aki, pues ainda tin oportunidad pa scolnan participa.
“Mi ta extende un invitacion na tur e scolnan na Aruba pa bin cu un proyecto innovativo, inscribi esaki y wak asina si bo scol por bira ganador pa ricibi fondo pa e proyecto innovativo desea. Danki na tur scol cu a participa caba na e proyecto aki, y danki na Futura cu a traha duro pa haci esaki posibel” Prome Minister a expresa.