Oranjestad,
Diarason ultimo, Sr. Reynaldo Maduro hunto cu un ex meneer di scol, Sr. Mario van der Biezen, a deleita nos grandi na Centro Kibrahacha. Reynaldo Maduro actualmente ta cu vakantie na Aruba. Sr. Maduro ta original di Kas di Paloma, sali di famia Maduro-Kelly. E ta bibando na Hulanda caminda mayoria di su bida e la biba, e ta casa y tin cuater yiu muhe. Cu tempu e la siña domina e arte di toca guitara.
Tata di Reynaldo Maduro, kende tabata yama Pancho, tambe tabata cantante y tabata toca guitara.
Mario van der Biezen, ta un ex meneer di scol cu ta disfrutando di su pension. Mario a nace y a crece den Oranjestad, e ta bin di un famia hopi musical y cu ta gusta bailamento tambe. Mario ta conoci pa baila den e grupo di danza Masiduri. Tambe ta toca tambu.
Diadomingo despues di un lunch cu famia, nan a uni pa asina alegra nos grandinan na Centro Kibrahacha y na Cas di Chepa riba diabierna ultimo. Esaki nan a haci’e cu hopi placer, pasobra musica ta nan pasion y nan ta gosa mirando nos grandinan gosa, cantando y te hasta pidi peticion pa canticanan.
Reynaldo su vakantie ta yegando na su fin, pero sigur e lo bolbe bek Aruba pa pasa tempo cu nan famia pa nan relaha.
Mario y Reynaldo a haci e presentacionnan aki voluntariamente, Esaki ta nan forma di mantene cultura di Aruba na bida, door di honra nos grandinan cu canticanan di nan infancia.